ახალი ამბები
სოლომონ პავლიაშვილმა ევროკავშირისა და აღმოსავლეთ პარტნიორობის ქვეყნების სოფლის მეურნეობის მინისტრების შეხვედრაში მიიღო მონაწილეობა
გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა ესტონეთის რესპუბლიკის ქალაქ ტარტუში გამართულ ევროკავშირისა და აღმოსავლეთ პარტნიორობის ქვეყნების სოფლის მეურნეობის მინისტრების შეხვედრაში მიიღო მონაწილეობა.
შეხვედრა სოფლის მეურნეობის ყოველწლიური გამოფენის (Annual Agricultural EXPO 2022) ფარგლებში დაგეგმილი საერთაშორისო კონფერენციის „ცირკულარული ბიოეკონომიკა - სურსათის მდგრად წარმოებაზე გადასვლის მექანიზმი“ პარალელურად გაიმართა.
სოლომონ პავლიაშვილმა, კონფერენციაზე სიტყვით გამოსვლისას, საქართველოში ცირკულარული ეკონომიკის განვითარების კუთხით არსებულ მიღწევებსა და გამოწვევებზე ისაუბრა და ევროკავშირისა და აღმოსავლეთ პარტნიორობის ქვეყნებთან ცირკულარული ბიოეკონომიკის განვითარების კუთხით თანამშრომლობის გაღრმავების სურვილი გამოთქვა.
მინისტრის მოადგილემ ხაზი გაუსვა, მდგრადი განვითარების მიზნების მისაღწევად, ბიოეკონომიკის განვითარებისა და სათბური აირების ემისიების შემცირების გზით, ქვეყანაში მწვანე ეკონომიკის ხელშეწყობის მნიშვნელობის საკითხს.
შეხვედრის ფარგლებში, მონაწილეებმა მწვანე ეკონომიკის პრინციპებზე დაფუძნებული ხე-ტყის ნარჩენების სადემონსტრაციო ბიოგადამმუშავებელი საწარმო დაათვალიერეს.