ახალი ამბები
რეგიონებში მოსახლეობასთან შეხვედრები გრძელდება
ცენტრალური და ადგილობრივი ხელისუფლების წარმომადგენლები ოზურგეთის მუნიციპალიტეტის სოფლების ჭანიეთის, ლიხაურის და მაკვანეთის მოსახლეობას შეხვდნენ.
შეხვედრაზე გარემოს დაცვისა და სოფლის მეურნეობის სამინისტროს სოფლის მეურნეობის, სურსათისა და სოფლის განვითარების დეპარტამენტის უფროსმა, თენგიზ კალანდაძემ მოსახლეობას სამინისტროს მიერ განხორციელებული, მიმდინარე და დაგეგმილი სახელმწიფო პროექტები და მიღწეული შედეგები გააცნო.
შეხვედრაზე ადგილობრივებმა სოფლებში არსებულ პრობლემებზე ისაუბრეს და ხელისუფლების წარმომადგენლებს ის საჭიროებები გააცნეს, რაც მოსახლეობისთვის განსაკუთრებით მნიშვნელოვანია.
პრიორიტეტულ საკითხებად, სოფლებში ჭანიეთსა და ლიხაურში წყალმომარაგების სისტემის რეაბილიტაცია, ხოლო სოფელ მაკვანეთში შიდა გზების მოწესრიგება და გოგიეთის უბნის სრული გაზიფიცირება დასახელდა. ადგილობრივებმა სოფლის ცენტრში მდებარე კლუბის რეაბილიტაცია და გარე განათების მოწყობის მნიშვნელობაზეც ისაუბრეს.
ადგილობრივი ხელისუფლების წარმომადგენლებმა მოსახლეობას მუნიციპალიტეტში მიმდინარე და დაგეგმილ პროექტებზე დეტალური ინფორმაცია მიაწოდეს. განსაკუთრებული ყურადღება გამახვილდა მუნიციპალური და სახელმწიფო სერვისების განვითარების საკითხებზე.
მოსახლეობასთან შეხვედრებს საქართველოს პარლამენტის წევრები გიორგი ვოლსკი, თემურ ჭკუასელი და გია გაჩეჩილაძე, გურიის მხარის რწმუნებულის მოადგილე ქეთევან მოისწრაფეშვილი და ადგილობრივი თვითმმართველობის წარმომადგენლები ესწრებოდნენ.