ახალი ამბები
მონრეალის ოქმის კიგალის ცვლილების საქართველოში რატიფიკაციის საკითხზე სამუშაო შეხვედრა გაიმართა
ოზონის შრის დამშლელი ნივთიერებების შესახებ მონრეალის ოქმის კიგალის ცვლილების საქართველოში რატიფიკაციის და მასთან დაკავშირებულ საკანონმდებლო ცვლილებებთან დაკავშირებით, გარემოს დაცვისა და სოფლის მეურნეობის სამინისტროში სამუშაო შეხვედრა გაიმართა.
კიგალის ცვლილება კლიმატის ცვლილების შერბილების მიზნით შეიქმნა და მიზნად ისახავს ეტაპობრივად მოხდეს ძალიან მაღალი გლობალური დათბობის პოტენციალის (გდპ) მქონე ნივთიერებების მოხმარების შემცირება.
კიგალის ცვლილებას დღეისათვის უკვე 137 ქვეყანა შეუერთდა, მათ შორის, ევროკავშირის თითქმის ყველა ქვეყანა და მონრეალის ოქმით რეგულირებული ნივთიერებების უმსხვილესი მწარმოებლები. გარემოს დაცვისა და სოფლის მეურნეობის სამინისტრო გეგმავს საქართველოს პარლამენტს კიგალის ცვლილების რატიფიკაციის საკითხი განსახილველად უახლოეს მომავალში წარუდგინოს.
როგორც შეხვედრაზე გარემოს დაცვისა და სოფლის მეურნეობის სამინისტროს ატმოსფერული ჰაერის სამმართველოს ხელმძღვანელმა, ნოე მეგრელიშვილმა აღნიშნა, კიგალის ცვლილების დროული რატიფიკაცია მნიშვნელოვნად გაუადვილებს საქართველოს მონრეალის ოქმის ვალდებულებების შესრულებას განსაზღვრულ ვადებში.
„კლიმატის ცვლილების შედეგად, ყოველწლიურად იზრდება მოთხოვნა სიცივის წარმოებასა და ჰაერის კონდიცირებაზე. შედეგად, ამ სექტორში მოხმარებული ძალიან მაღალი გლობალური დათბობის პოტენციალის (გდპ) მქონე მაცივარაგენტების მოხმარება, შესაძლოა, კლიმატის ცვლილების გამომწვევი ერთ-ერთი მნიშვნელოვანი ფაქტორი გახდეს. ამ რისკის თავიდან არიდების მიზნით, მონრეალის ოქმის კიგალის ცვლილება 2045 წლისთვის მაღალი გდპ-ს მქონე მაცივარაგენტების მოხმარებას, დაახლოებით, 85%-მდე შეამცირებს“, - აღნიშნა ნოე მეგრელიშვილმა.
სამუშაო შეხვედრას მონრეალის ოქმით რეგულირებული ნივთიერებების უმსხვილესი იმპორტიორები, სამაცივრო და ჰაერის კონდიცირების სექტორში მოქმედი სერვისცენტრების და სექტორის სხვა წარმომადგენლები ესწრებოდნენ.