ახალი ამბები
საქართველოს დელეგაცია გეოდეზისტთა საერთაშორისო ფედერაციის (FIG) 27-ე კონფერენციაში მონაწილეობდა
პოლონეთში, ქალაქ ვარშავაში, გეოდეზისტთა საერთაშორისო ფედერაციის (FIG) 27-ე კონფერენცია გაიმართა. ღონისძიებაში საქართველოს გარემოს დაცვისა და სოფლის მეურნეობის სამინისტროს ჰიდრომელიორაციისა და მიწის მართვის დეპარტამენტის ხელმძღვანელი გიზო ჭელიძე და საჯარო რეესტრის ეროვნული სააგენტოს წარმომადგენლები მონაწილეობდნენ.
კონფერენციის ფარგლებში, გაეროს სურსათისა და სოფლის მეურნეობის ორგანიზაციის (FAO) ეგიდით, მიწის კონსოლიდაციისა და მიწის ბანკინგის საკითხებთან დაკავშირებით ჩატარდა სესია, რომელზეც ქართული დელეგაციის წევრებმა ქვეყანაში არსებული მიწის ფრაგმენტაციის, მიწის კონსოლიდაციასთან დაკავშირებული გამოწვევების, მიწის სისტემური რეგისტრაციის, ასევე, მიწის რეფორმის ფარგლებში მიმდინარე და დაგეგმილი ღონისძიებების შესახებ პრეზენტაცია წარადგინეს. სესიაზე, მიწის კონსოლიდაციისა და მიწის ბანკინგის სფეროში თურქეთისა და ჩრდილოეთ მაკედონიის გამოცდილებაზეც იმსჯელეს.
ღონისძიების ფარგლებში, საქართველოს დელეგაციამ შეხვედრები გამართა პოლონეთის ეკონომიკური განვითარებისა და ტექნოლოგიების სახელმწიფო მდივან პიოტრ უჩინსკისთან და გეოდეზიისა და კარტოგრაფიის სათაო ოფისის (GUGiK) ხელმძღვანელ ალისია კულკასთან. პოლონურმა მხარემ საქართველოს წარმომადგენლებს მიწის ადმინისტრირების, მიწის რესურსების აღრიცხვის და პოლონეთში მოქმედი მიწის საინფორმაციო გეოპორტალის შესახებ გამოცდილება გაუზიარა. პიოტრ უჩინსკიმ მზაობა გამოთქვა, ტექნიკური დახმარების გაუწიოს შესაბამის სამთავრობო ინსტიტუციებს მიწის რესურსების მართვის გაუმჯობესებისა და ევროპულ ნორმებთან დაახლოების მიმართულებით.
შეხვედრაზე, ქართულმა მხარემ საქართველოში მიწასთან დაკავშირებით მიმდინარე რეფორმებისა და არსებული გამოწვევების შესახებ ინფორმაცია წარადგინა.
ქართული დელეგაციის წევრებმა სამუშაო შეხვედრა გამართეს გაეროს სურსათისა და სოფლის მეურნეობის ორგანიზაციის (FAO) მიწის კონსოლიდაციის ორგანიზაციის ლენდნეტის ხელმძღვანელობასთანაც. შეხვედრაზე განიხილეს მსოფლიო ბანკის დაფინანსებითა და FAO-ს ექსპერტთა მონაწილეობით, საქართველოში დაგეგმილი მიწის კონსოლიდაციის კვლევის ჩატარების დეტალები და ვადები. მიღწეულ იქნა შეთანხმება, რომ აღნიშნული კვლევის შედეგებზე დაყრდნობით, FAO საქართველოსთვის მოამზადებს მიწის კონსოლიდაციის ეროვნულ კონცეფციას და საპილოტე პროექტის მონახაზს, რომელზე დაყრდნობითაც შემუშავდება საქართველოს მიწის კონსოლიდაციის რეფორმა ეროვნულ დონეზე.