ახალი ამბები
გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი LEADER/CLLD მიდგომაზე დაფუძნებული ადგილობრივი მხარდაჭერის პროგრამის საჯარო განხილვას დაესწრო
შეხვედრაზე გიორგი ხანიშვილმა მადლობა გადაუხადა ევროკავშირს და გაეროს განვითარების პროგრამას მხარდაჭერისთვის და ყურადღება პროგრამის მნიშვნელობაზე გაამახვილა.
„სახელმწიფო სოფლის გასაძლიერებლად, დონორ ორგანიზაციებთან ერთად, არაერთ მნიშვნელოვან პროექტს ახორციელებს, თუმცა, გამოწვევები კვლავ არსებობს. მოხარული ვარ, რომ ახალი პროექტით, რომელსაც სოფლის განვითარების სააგენტო განახორციელებს, საქართველოს რეგიონებში მცხოვრებ მოსახლეობას ადგილობრივი საჭიროებების გათვალისწინებით ინიცირებული პროექტების განხორციელების შესაძლებლობა მიეცემა“,-განაცხადა გიორგი ხანიშვილმა.
„მოგეხსენებათ, ევროკავშირი, გაეროს განვითარების პროგრამის დახმარებით, სოფლის განვითარების სააგენტოს მხარს უჭერდა საგრანტო პროგრამების განხორციელების პროცესში. მნიშვნელოვანია, რომ მომავალი წლიდან, უკვე სახელმწიფო იწყებს სოფლის განვითარების პროგრამას, რაც ადგილობრივი განვითარების ჯგუფების ჩართულობით მნიშვნელოვან წვლილს შეიტანს კონკრეტული სოფლის საჭიროებების გადაჭრის პროცესში; ეს კი, ხელს შეუწყობს სოფლის სოციალური და ეკონომიკური მდგომარეობის გაუმჯობესებას“, - განაცხადა ქეთევან ხუციშვილმა, ევროკავშირის წარმომადგენელმა საქართველოში, სოფლის განვითარების, სამოქალაქო უსაფრთხოებისა და კრიზისების მართვის პროგრამების მენეჯერმა.
შეხვედრას სამინისტროს შესაბამისი სამსახურის ხელმძღვანელი პირები, გაეროს განვითარების პროგრამის ეროვნული მენეჯერი ნოდარ კერესელიძე, სამოქალაქო სექტორის, მუნიციპალიტეტების ადგილობრივი განვითარების ჯგუფების წარმომადგენლები და დაინტერესებული მხარეები ესწრებოდნენ.