ახალი ამბები
ოთარ შამუგია, ქალაქ კლერმონ-ფერანში, საფრანგეთის განვითარების სააგენტოს წარმომადგენლებს შეხვდა
საქართველოს გარემოს დაცვისა და სოფლის მეურნეობის მინისტრი ოთარ შამუგია, საფრანგეთში სამუშაო ვიზიტით იმყოფებოდა. ვიზიტის ფარგლებში, ქ. კლერმონ-ფერანში მიმდინარე უმსხვილეს მეცხოველეობის გამოფენაზე Sommet De L’elevage საფრანგეთის განვითარების სააგენტოს სოფლის მეურნეობისა და ბიომრავალფეროვნების მიმართულების ხელმძღვანელს, ვინსენტ ტანგის შეხვდა.
შეხვედრაზე ყურადღება გამახვილდა საფრანგეთის განვითარების სააგენტოს მიერ განხორციელებულ და მიმდინარე პროექტებზე. აღსანიშნავია, რომ საქართველოსა და საფრანგეთის განვითარების სააგენტოს შორის თანამშრომლობის პროგრამის პრიორიტეტულ მიმართულებებად განსაზღვრულია მელიორაცია და მიწის მართვა. პროგრამა ითვალისწინებს ზემო სამგორის (ირიგაცია) პროექტს. როგორც მინისტრმა აღნიშნა, მნიშვნელოვანია დროულად მოხდეს ინიცირებული ახალი პროექტის განხორციელება.
„ჩვენ აქტიურად ვმუშაობთ საერთაშორისო სტანდარტების, ევროპული მართვის სისტემების დანერგვის საკითხებზე. ჩვენი საერთაშორისო პარტნიორების მხარდაჭერა და საუკეთესო პრაქტიკების გაზიარება არის უმნიშვნელოვანესი ფაქტორი დასახული მიზნების მისაღწევად. მადლობას ვუხდი ყველა საერთაშორისო და დონორ ორგანიზაციას, მათ შორის, საფრანგეთის განვითარების სააგენტოს მრავალწლიანი წარმატებული და დაგეგმილი სამომავლო თანამშრომლობისთვის", - განაცხადა ოთარ შამუგიამ.
საფრანგეთის განვითარების სააგენტოს წარმომადგენლებთან შეხვედრას საქართველოს საგანგებო და სრულუფლებიანი ელჩი საფრანგეთის რესპუბლიკაში, გოჩა ჯავახიშვილი ესწრებოდა.