ახალი ამბები
ნინო თანდილაშვილმა ენერგეტიკული გაერთიანების არაფორმალურ მინისტერიალში მიიღო მონაწილეობა
საქართველოს გარემოს დაცვისა და სოფლის მეურნეობის მინისტრის პირველმა მოადგილე ნინო თანდილაშვილმა ენერგეტიკული გაერთიანების არაფორმალური მინისტერიალის ფარგლებში ორმხრივი შეხვედრა ენერგეტიკული გაერთიანების სამდივნოს პრეზიდენტთან არტურ ლორკოვსკისთან და მწვანე შეთანხმების განყოფილების უფროსთან ადამ ცვეჩთან გამართა.
შეხვედრაზე ნინო თანდილაშვილმა საქართველოში კლიმატის ცვლილების მიმართულებით არსებული პროგრესის შესახებ ისაუბრა და ყურადღება 2023 წელს საქართველოს მიერ მიღებული გრძელვადიანი დაბალი ემისიის განვითარების სტრატეგია/კონცეფციის მნიშვნელობაზე გაამახვილა (LT LEDS).
მინისტრის პირველი მოადგილის განცხადებით, აღნიშნული დოკუმენტით საქართველო მიზნად ისახავს გახდეს „ნახშირბადნეიტრალური“ 2050 წლისთვის, რაც პირდაპირ ეხმიანება 2050 წლისათვის ევროკავშირისა და ენერგეტიკული გაერთიანების მიერ გაცხადებულ ნახშირბადნეიტრალურობის სამიზნეს.
შეხვედრის ფარგლებში, ნინო თანდილაშვილმა ისაუბრა ეროვნულ დონეზე განსაზღვრული წვლილის განახლების პროცესზე და აღნიშნა, რომ ეროვნულ დონეზე განსაზღვრული წვლილის განახლება პარიზის შეთანხმების შესაბამისად და გაეროს კლიმატის ცვლილების ჩარჩო კონვენციის სამდივნოსთვის წარდგენა 2025 წლისათვის იგეგმება.
საუბარი ასევე შეეხო საქართველოში სათბურის ემისიების მონიტორინგის, ანგარიშგებისა და დამოწმების სისტემის დანერგვას ნახშირბად-ინტენსიური სექტორებისათვის, რომელიც ენერგეტიკული გაერთიანების დამფუძნებელი ხელშეკრულებით გათვალისწინებულ ვალდებულებას წარმოადგენს.
ნინო თანდილაშვილმა აღნიშნა, „გარემოს დაცვის შესახებ“ საქართველოს კანონში ცვლილებების შეტანის შესახებ“ ევროკავშირის სამართლებრივი აქტების შესაბამისად მომზადებული საქართველოს კანონის პროექტის მნიშვნელობის საკითხი, რომლის საფუძველზეც ქვეყანას ექნება უტყუარი მონაცემები სამრეწველო სექტორებიდან სათბურის გაზების წლიური გაფრქვევების შესახებ, რაც ევროკავშირის ემისიებით ვაჭრობის სისტემის დანერგვის ერთ-ერთი აუცილებელ წინაპირობას წარმოადგენს.
ენერგეტიკული სამდივნოს დირექტორმა ხაზი გაუსვა, კლიმატის ცვლილების მიმართულებით არსებული ვალდებულებების შესრულების კუთხით, საქართველოს პროგრესს და როგორც ფინანსური ასევე, ტექნიკური კუთხით დახმარების სურვილი გამოთქვა.
აღსანიშნავია, რომ არაფორმალური მინისტერიალი ბოსნია და ჰერცეგოვინაში, ქალაქ ბანია-ლუკაში გაიმართა, რომლის ერთ-ერთ ძირითად მიზანს ნახშირბადის ფასის განსაზღვრის მექანიზმის და ევროკომისიის დაკვეთით ჩატარებული რეგულირების ზეგავლენის შეფასების კვლევის პირველადი ანგარიშის გაცნობა წარმოადგენდა.
არაფორმალურ მინისტერიალში ევროკომისიის წარმომადგენლები, ენერგეტიკული გაერთიანების ხელშემკვრელი სახელმწიფოების ენერგეტიკისა და გარემოს დაცვის მინისტრები და სხვა მაღალი თანამდებობის პირები მონაწილეობდნენ.