ახალი ამბები
ოთარ შამუგია გაეროს მუდმივ კოორდინატორს საქართველოში დიდიე ტღებიუკს შეხვდა
გარემოს დაცვისა და სოფლის მეურნეობის მინისტრმა ოთარ შამუგიამ და გაეროს მუდმივმა კოორდინატორმა საქართველოში დიდი ტღებიუკმა სოფლისა და სოფლის მეურნეობის განვითარების, ბიომრავალფეროვნების კონსერვაციის, კლიმატის ცვლილებების შერბილების კუთხით სტრატეგიული თანამშრომლობის გაძლიერებაზე იმსჯელეს.
შეხვედრაზე ოთარ შამუგიამ გაეროს მუდმივ კოორდინატორს სამინისტროს მიერ განხორციელებული და მიმდინარე პროექტები გააცნო და ყურადღება საკანონმდებლო კუთხით მიღწეულ პროგრესზე გაამახვილა. მინისტრმა პარტნიორებს რეფორმების პროცესში გაწეული მხარდაჭერისთვის მადლობა გადაუხადა.
„გაეროს მხარდაჭერით, როგორც სოფლის მეურნეობის, ასევე გარემოს დაცვის მიმართულებით მნიშვნელოვან პროექტებს ვახორციელებთ. მდგრადი განვითარების მიზნების მისაღწევად, გარემოსდაცვითი მიმართულებით არაერთი რეფორმა განვახორციელეთ, მიმდინარეობს სოფლის მეურნეობის მხარდამჭერი პროგრამები, რომელიც ფერმერებს, მეწარმეებს და სოფლად მცხოვრებ მოქალაქეებს ხარისხიანი პროდუქტის წარმოებაში, მეტი შემოსავლის მიღებასა და სოციალურ-ეკონომიკური პირობების გაუმჯობესებაში ეხმარება. ევროკავშირის კანდიდატის სტატუსის მიღების შემდეგ, ჩვენი ვალდებულებები კიდევ უფრო გაიზარდა, რაც პარტნიორებთან უფრო მჭიდრო თანამშრომლობას მოითხოვს“, - აღნიშნა ოთარ შამუგიამ.
გაეროს მუდმივმა კოორდინატორმა საქართველოში დიდიე ტღებიუკმა გარემოს დაცვისა და სოფლის მეურნეობის სამინისტროსთან წლების განმავლობაში არსებულ ნაყოფიერ თანამშრომლობას გაუსვა ხაზი და აღნიშნა, რომ გაერო საქართველოს მხარდაჭერას მომავალშიც გააგრძელებს.
„ვაგრძელებთ საქართველოს გარემოს დაცვისა და სოფლის მეურნეობის სამინისტროსთან თანამშრომლობას სოფლისა და სოფლის მეურნეობის განვითარების, კლიმატის ცვლილების შერბილების, ბიომრავალფეროვნების კონსერვაციის მიმართულებით. მოხარული ვარ, რომ ვხედავ გაეროს სხვადასხვა ორგანიზაციასთან ძალიან ნაყოფიერ თანამშრომლობას. იმისთვის, რომ მივაღწიოთ მდგრად განვითარებას საქართველოში და შემცირდეს სიღარიბე, რაც ეროვნული პრიორიტეტია, აუცილებელია ადგილობრივ საზოგადოებასთან მუშაობა და სოფლის მეურნეობის სექტორის განვითარების ხელშეწყობა“, - განაცხადა დიდიე ტღებიუკმა.
სამინისტროში გამართულ შეხვედრას გაეროს სურსათისა და სოფლის მეურნეობის ორგანიზაციის (UNFAO) წარმომადგენლის მოადგილე საქართველოში მამუკა მესხი ესწრებოდა.