ახალი ამბები
დავით სონღულაშვილი: „საქართველოსა და ყაზახეთს შორის ურთიერთობების გაძლიერება დადებითად აისახება მთლიანად რეგიონზე“
საქართველოს პრემიერ -მინისტრის ირაკლი კობახიძის ოფიციალური ვიზიტის ფარგლებში ყაზახეთში, საქართველოს გარემოს დაცვისა და სოფლის მეურნეობის მინისტრი დავით სონღულაშვილი იმყოფება.
მინისტრის განცხადებით, ბოლო წლებში საქართველოსა და ყაზახეთს შორის თანამშრომლობა და ორმხრივი ურთიერთობები დინამიკურად ვითარდება, ხოლო მიმდინარე ოფიციალური ვიზიტი ამ თანამშრომლობას თვისობრივად ახალ ეტაპზე გადაიყვანს.„კიდევ უფრო გააქტიურდება ეკონომიკური თანამშრომლობა და გაღრმავდება საქართველოსა და ყაზახეთს შორის ეკონომიკური კავშირები. ეს აისახება სხვადასხვა მიმართულებით, მათ შორის სოფლის მეურნეობის, ტრანსპორტის და ინვესტიციების სფეროებში. საერთო ჯამში, ეს პროცესი ორივე ქვეყნის ეკონომიკურ განვითარებას კიდევ უფრო შეუწყობს ხელს, ხოლო ორმხრივი ურთიერთობების შემდგომი გაძლიერება დადებითად აისახება მთლიანად რეგიონზე“,- განაცხადა დავით სონღულაშვილმა.