ახალი ამბები
ნინო თანდილაშვილმა ეუთოს რიგით 27-ე ეკონომიკურ და გარემოსდაცვით ფორუმში მიიღო მონაწილეობა
გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა 11-13 სექტემბერს, ჩეხეთის რესპუბლიკაში, ქალაქ პრაღაში გამართულ ეუთოს რიგით 27-ე ეკონომიკურ და გარემოსდაცვით ფორუმში მიიღო მონაწილეობა.
ფორუმის ფარგლებში, გარემოს დაცვისა და სოფლის მეურნეობის მინისტრის მოადგილე მოხსენებით წარდგა საქართველოში გარემოსდაცვითი მმართველობისა და მდგრადი განვითარების კუთხით განხორციელებული, მიმდინარე და დაგეგმილი რეფორმებისა და კონკრეტული ღონისძიებების შესახებ. ნინო თანდილაშვილმა ყურადღება გაამახვილა გარემოსდაცვითი პოლიტიკის შემუშავების, საკანონმდებლო ჩარჩოს დახვეწისა და გაძლიერების, აღსრულებისა და მონიტორინგის მექანიზმების დანერგვის მიმართულებით გადადგმულ ნაბიჯებზე და სამომავლო გეგმებზე. მინისტრის მოადგილემ დეტალურად ისაუბრა ეროვნულ და საერთაშორისო დონეზე თანამშრომლობის გაძლიერების მნიშვნელობაზე, ასევე, საქართველოში მდგრადი განვითარების მიზნებისა და ამოცანების განხორციელების ხელშეწყობის მიზნით, მთავრობის მიერ განხორციელებულ კონკრეტულ ქმედებებსა და ინიციატივებზე.
ფორუმის ფარგლებში, გაიმართა დასკვნითი შეხვედრა, რომლის მთავარ თემას ეფექტიანი მმართველობის ხელშეწყობისა და კომუნიკაციის გაღრმავების გზით, ეუთო-ს წევრ ქვეყნებში ეკონომიკური პროგრესის და უსაფრთხოების, ენერგეტიკის სფეროში თანამშრომლობისა და თანამედროვე ტექნოლოგიების დანერგვის ხელშეწყობა წარმოადგენდა.