ახალი ამბები
ხატია წილოსანი დედოფლისწყაროს მუნიციპალიტეტის სოფლებში მოსახლეობას შეხვდა
გარემოს დაცვისა და სოფლის მეურნეობის მინისტრის მოდგილე ხატია წილოსანი დედოფლისწყაროს მუნიციპალიტეტის სოფლების ზემო მაჩხაანის, გამარჯვებისა და ხორნაბუჯის მოსახლეობას შეხვდა და სოფლებში არსებულ პრობლემებსა და საჭიროებებს ადგილზე გაეცნო.
ხატია წილოსანმა ადგილობრივ მოსახლეობას სოფლისა და სოფლის მეურნეობის განვითარების, ასევე გარემოს დაცვის კუთხით განხორციელებულ, მიმდინარე და დაგეგმილ პროექტებზე მიაწოდა ინფორმაცია.
დედოფლისწყაროს მუნიციპალიტეტში სოფლის მეურნეობის წამყვანი დარგები მევენახეობა, მეცხოველეობა და მარცვლოვანი კულტურების წარმოებაა, შესაბამისად, მოსახლეობის შეკითხვები სწორედ აღნიშნული დარგების განვითარების ხელშეწყობას უკავშირდებოდა. ამასთან, ადგილობრივებმა ძირითად საჭიროებად სასმელი წყლის, ქარსაფარი ზოლების, სასოფლო-სამეურნეო მიწების გასარწყავიანების, შიდა გზებისა და სხვა ინფრასტრუქტურული პრობლემების მოგვარება დაასახელა.
როგორც ცენტრალური და ადგილობრივი ხელისუფლების წარმომადგენლებმა აღნიშნეს, მსგავსი შეხვედრების მიზანია მოსახლეობის პრობლემების ადგილზე გაცნობა, რათა ყველა მუნიციპალიტეტის ძირითადი საჭიროები მომავალი წლის ბიუჯეტში აისახოს. ადგილობრივების მიერ დასახელებული პრობლემები ხელისუფლების ყურადღების მიღმა არ დარჩება და ყველა მათგანის მოგვარება ეტაპობრივად მოხდება.
დედოფლისწყაროს მუნიციპალიტეტის სოფლების მოსახლეობასთან შეხვედრებს დედოფლისწყაროს მაჟორიტარი დეპუტატი ირაკლი შიოლაშვილი, კახეთის მხარის გუბერნატორის მოადგილე გივი მეტრეველი და ადგილობრივი თვითმმართველობის წარმომადგენლები ესწრებოდნენ.
საქართველოს ცენტრალური და რეგიონული მთავრობის წარმომადგენლების შეხვედრები მოსახლეობასთან, სხვა მუნიციპალიტეტებშიც გაგრძელდება.