საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

მწარმოებლის გაფართოებული ვალდებულების (მგვ) პრინციპის დანერგვის შესახებ საკონსულტაციო შეხვედრა გაიმართა

2019 წლის დეკემბერში, ძალაში შედის საქართველოს „ნარჩენების მართვის კოდექსით“ განსაზღვრული მწარმოებლის გაფართოებული ვალდებულება, რომელიც კონკრეტული პროდუქციის მწარმოებლისა და იმპორტიორის მიერ ადამიანისა და ჯანმრთელობისათვის სახიფათო სპეციფიკური ნარჩენების შეგროვებასა და დამუშავებაზე, პასუხისმგებლობის აღებას ითვალისწინებს.
სასტუმროში „Holiday Inn“, მწარმოებლის გაფართოებული ვალდებულების (მგვ) პრინციპის დანერგვის შესახებ საკონსულტაციო შეხვედრა გაიმართა.

შეხვედრას გარემოს დაცვისა და სოფლის მეურნეობის სამინისტროს შესაბამისი სამსახურის წარმომადგენლებთან ერთად, საერთაშორისო, დონორი ორგანიზაციების, კერძო სექტორის, სავაჭრო პალატების, ბიზნესასოციაციებისა და სხვა დაინტერესებული მხარეების წარმომადგენლები ესწრებოდნენ.

ღონისძიების მონაწილეებმა ელექტრო და ელექტრონული ნარჩენების კანონქვემდებარე აქტის პროექტი განიხილეს და ელექტრო და ელექტრონული პროდუქციის მწარმოებელი და იმპორტიორი კომპანიების მიერ მწარმოებლის გაფართოებული ვალდებულების ორგანიზაციის შექმნის პროცესში დახმარების შესაძლებლობებზე იმსჯელეს.
შეხვედრის ფარგლებში, ასევე წარმოდგენილი იყო ევროპული ქვეყნების გამოცდილება მწარმოებლის გაფართოებული ვალდებულების ორგანიზაციების მოწყობის, ოპერირების, მათ წინაშე მდგარი გამოწვევებისა და შესაძლებლობების შესახებ.

აღნიშნული პროექტი გარემოს დაცვისა და სოფლის მეურნეობის სამინისტროს მხარდაჭერით, გაეროს განვითარების პროგრამის (UNDP), შვედეთის მთავრობის დაფინანსებით და ორგანიზაცია „Georgia’s Environmental Outlook – GEO“- სთან თანამშრომლობით ხორციელდება.