საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

გარემოს დაცვისა და სოფლის მეურნეობის სამინისტროში წყლის რესურსების მდგრადი მართვის მიმართულებით საქართველოს მიღწევები შეაჯამეს

გარემოს დაცვისა და სოფლის მეურნეობის მინისტრმა, ლევან დავითაშვილმა წყლის მდგრადი მართვის მიმართულებით საქართველოს მიღწევები ევროკავშირის ელჩთან, კარლ ჰარცელთან, ავსტრიის რესპუბლიკის ელჩთან, არად ბენკოსთან და გარემოს ეროვნული სააგენტოს უფროსთან, ანდრო ასლანიშვილთან ერთად, ევროკავშირის პროექტის „ევროკავშირის წყლის ინიციატივა პლიუსი აღმოსავლეთის პარტნიორობის ქვეყნებისათვის (EUWI+)“ და გარემოს დაცვისა და სოფლის მეურნეობის სამინისტროს ერთობლივ ღონისძიებაზე შეაჯამა.

ლევან დავითაშვილმა მადლობა გადაუხადა ევროკავშირის წარმომადგენლებს მხარდაჭერისთვის, საქართველოსა და ევროკავშირის თანამშრომლობის მნიშვნელობაზე ისაუბრა და აღნიშნა, რომ ასოცირების შესახებ შეთანხმებით აღებული ვალდებულებების შესაბამისად, საქართველო აქტიურად აგრძელებს ეროვნული პოლიტიკისა და სტრატეგიის ევროკავშირის წყლის ჩარჩო დირექტივასთან შესაბამისობაში მოყვანას.

„ჩვენ შევქმენით თანამედროვე, ევროპული სტანდარტების ლაბორატორია, რომელიც აღჭურვილია ულტრათანამედროვე აპარატურით; მუდმივ რეჟიმში მიმდინარეობს ლაბორატორიაში დასაქმებული პერსონალის ტრენინგები და მათი შესაძლებლობების გაძლიერება. ვგეგმავთ, ლაბორატორია რეგიონული მნიშვნელობის გავხადოთ და გავაფართოოთ სერვისების სპექტრი. უსაფრთხო წყალი უმნიშვნელოვანესია ადამიანის სიცოცხლისა და ჯანმრთელობის უზრუნველყოფის, მდგრადი საარსებო საშუალებების შექმნისა და ეკოსისტემების შენარჩუნებისთვის. საქართველო მდიდარია წყლის რესურსებით; ჩვენთვის პრიორიტეტია ეკოლოგიური მდგომარეობის გაუმჯობესება, წყლის ხარისხობრივი მაჩვენებლების თანამედროვე სტანდარტებით გამოკვლევა და მუდმივი მონიტორინგი “, - აღნიშნა გარემოს დაცვისა და სოფლის მეურნეობის მინისტრმა, ლევან დავითაშვილმა.

როგორც ევროკავშირის ელჩმა, კარლ ჰარცელმა აღნიშნა, მისასალმებელია, რომ გარემოს ეროვნული სააგენტოს ლაბორატორიას წყლის ხარისხის შესამოწმებელი აღჭურვილობა გადაეცა. ეს არის კარგი შესაძლებლობა, რომ ლაბორატორიამ საერთაშორისო სტანდარტების შესაბამისად იფუნქციონიროს.

,,ევროკავშირს აქვს აღებული ვალდებულება მხარი დაუჭიროს საქართველოში გარემოსა და მოსახლეობის ჯანმრთელობის გაუმჯობესებას. ამის მთავარი ასპექტი წყლის ხარისხია. ლაბორატორიული აღჭურვილობა, რომელიც გარემოს ეროვნულ სააგენტოს EUWI + პროექტის ტექნიკურ დახმარებასთან ერთად გადაეცა, ამ მხარდაჭერის ნაწილია და საშუალებას მისცემს ხელისუფლებას და სხვა შესაბამის დაინტერესებულ მხარეებს გარემოს დასაცავად მყარი დასკვნებისა და ფაქტების საფუძველზე იმოქმედონ.” - განაცხადა კარლ ჰარცელმა

როგორც ღონისძიებაზე საქართველოში ავსტრიის რესპუბლიკის ელჩმა, არად ბენკომ აღნიშნა, ავსტრიას საქართველოსთან წყლის სექტორში თანამშრომლობის განვითარების კუთხით უკვე მრავალწლიანი ურთიერთობა აქვს.

„მოხარული ვართ, რომ საფრანგეთთან ერთად ჩვენ დავაფინანსეთ EUWI + პროექტი, დაახლოებით 1 მილიონი ევროს ოდენობით და დარწმუნებული ვართ, რომ საქართველო უფრო მეტად წავა წინ წყლის რესურსების მართვის კუთხით”, - განაცხადა ავსტრიის ელჩმა საქართველოში, არად ბენკომ.

ევროკავშირის პროექტის „ევროკავშირის წყლის ინიციატივა პლიუსი აღმოსავლეთის პარტნიორობის ქვეყნებისათვის (EUWI+)“ ფარგლებში, გარემოს ეროვნული სააგენტოს ატმოსფერული ჰაერის, წყლისა და ნიადაგის ანალიზის ლაბორატორიას წყლის ხარისხის კვლევისთვის უახლესი ხელსაწყო-დანადგარები გადაეცა, რაც ლაბორატორიას აძლევს შესაძლებლობას გაზარდოს წყლის ხარისხის კვლევის კომპონენტები, თანამედროვე მეთოდებით განახორციელოს სამეცნიერო-კვლევითი ანალიზები და მომხმარებელს სერტიფიცირებული ლაბორატორიული მომსახურება შესთავაზოს. აღნიშნული ხელს შეუწყობს წყლისა და მდინარეთა აუზების დაცვას საქართველოში და მის ფარგლებს გარეთ.

ღონისძიების ბოლოს, გარემოს დაცვისა და სოფლის მეურნეობის მინისტრმა, ლევან დავითაშვილმა, ევროკავშირის და ავსტრიის ელჩებმა და ღონისძიების სტუმრებმა, გარემოს ეროვნული სააგენტოს ლაბორატორია დაათვალიერეს და სამუშაო პროცესს გაეცნენ. მინისტრმა, ევროპელმა დიპლომატებმა და აღმოსავლეთ პარტნიორობის ევროპული სკოლის მოსწავლეებმა, ახალი ლაბორატორიული აღჭურვილობის გამოყენებით, სიმბოლურად, მდინარე მტკვრის წყლის ანალიზები ჩაატარეს.

გარემოს დაცვისა და სოფლის მეურნეობის სამინისტროში გამართულ ღონისძიებას საქართველოს მთავრობის, დიპლომატიური კორპუსის, საქართველოს პარლამენტის, სახელმწიფო და კერძო კომპანიების, არასამთავრობო ორგანიზაციების, გარემოს დაცვისა და სოფლის მეურნეობის სამინისტროსა და პროექტის „ევროკავშირის წყლის ინიციატივა პლიუსი აღმოსავლეთის პარტნიორობის ქვეყნებისათვის (EUWI+)“ წარმომადგენლები ესწრებოდნენ.