ახალი ამბები
საქართველოს სოფლის განვითარების მორიგი უწყებათაშორისი საკოორდინაციო საბჭოს შეხვედრა გაიმართა
შეხვედრა გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა გახსნა.უწყებათაშორისი საკოორდინაციო საბჭოს წევრებმა განახლებული ინფორმაცია მოისმინეს 2019 წელს განხორციელებული იმ აქტივობების შესრულების შესახებ, რომლებიც სოფლის განვითარების 2017-2020 წლების სტრატეგიის სამოქმედო გეგმითაა გათვალისწინებული. შეხვედრაზე იმსჯელეს 2019 წლის ENPARD III-ის ვალდებულებების და მათი შესრულების მდგომარეობის შესახებაც.
გაეროს განვითარების პროგრამის (UNDP) მხრიდან, წარმოდგენილი იყო საქართველოს სოფლის განვითარების 2017-2020 წლების სტრატეგიის 2017-2018 წლების სამოქმედო გეგმის შუალედური შეფასება.
„უწყებათაშორისი საკოორდინაციო საბჭოს შეხვედრაზე განისაზღვრა ის პრიორიტეტული საკითხები, რომლებიც ევროკავშირთან თანმშრომლობის მიმართლებით შეიძლება დაიგეგმოს და რაც ევროკავშირთან ნაკისრი ვალდებულებების შესრულებაში დაგვეხმარება“, - განაცხადა გარემოს დაცვისა და სოფლის მეურნეობის მინისტრის მოადგილემ, ხატია წილოსანმა.
როგორც საქართველოში გაეროს განვითარების პროგრამის (UNDP) პროექტის ეროვნულმა მენეჯერმა, ნოდარ კერესელიძემ შეხვედრაზე განაცხადა, გაეროს განვითარების პროგრამა EMPARD III-ის პროგრამის ფარგლებში მხარს უჭერს საკოორდინაციო საბჭოს, რომელიც სოფლის განვითარების პოლიტიკის მაკოორდინებელი სტრუქტურის გაძლიერების თვალსაზრისითაა შექმნილი. ნოდარ კერესელიძემ აღნიშნა, რომ გაეროს განვითარების პროგრამისთვის (UNDP) ერთ-ერთი პრიორიტეტული საკითხია საკოორდინაციო საბჭოს შესაძლებლობების გაძლიერება.
უწყებათაშორისი საკოორდინაციო საბჭოს შეხვედრა, ტრადიციულად, 6 თვეში ერთხელ იმართება. საბჭოს წევრები იმ ძირითად მიღწევებსა და საჭიროებებს განიხილავენ, რომლებიც საქართველოს მთავრობას ევროკავშირთან ნაკისრი ვალდებულებების შესრულების მიზნით აქვს განსახორციელებელი.
უწყებათაშორის საკოორდინაციო საბჭოს შეხვედრას გარემოს დაცვისა და სოფლის მეურნეობის სამინისტროს სისტემაში შემავალი შესაბამისი უწყებების, გაეროს განვითარების პროგრამის (UNDP) და სხვადასხვა სამთავრობო უწყების წარმომადგენლები ესწრებოდნენ.