ახალი ამბები
სოლომონ პავლიაშვილი ვეტერინარული დაავადებების შესახებ ყოველწლიურ საერთაშორისო კონფერენციას დაესწრო
ამერიკის შეერთებულ შტატებში, ქალაქ ჩიკაგოში ვეტერინარული დაავადებების შესახებ ყოველწლიური საერთაშორისო კონფერენცია (CRWAD) გაიმართა.
ღონისძიებაში 55 ქვეყნიდან 500-ზე მეტი მეცნიერი და დარგის სპეციალისტი მონაწილეობდა. კონფერენციის ფარგლებში, მონაწილეებმა სამეცნიერო ნაშრომები და პრეზენტაციები წარმოადგინეს.
საერთაშორისო კონფერენციაში, აშშ-ის ბიოლოგიური საფრთხის შემცირების სააგენტოს (DTRA) მიწვევით საქართველოდან გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი და სოფლის მეურნეობის სამინისტროს ლაბორატორიის წარმომადგენლები მონაწილეობდნენ.
„მსგავსი მასშტაბის კონფერენციაში მონაწილეობა, საშუალებას გვაძლევს გავეცნოთ და გავიზიაროთ ცხოველთა დაავადებებთან ბრძოლის, დიაგნოსტირების თანამედროვე მეთოდები და მიდგომები, ასევე საერთაშორისო ასპარეზზე წარმოვაჩინოთ საქართველოში მიმდინარე სამეცნიერო-კვლევითი საქმიანობის შედეგები და მიღწევები. ვეტერინარულ დაავადებებთან ბრძოლის წარმატებული საერთაშორისო პრაქტიკის გაზიარება და დანერგვა, ხელს შეუწყობს ქვეყნაში მეცხოველეობის დარგის განვითარებას, ჯანსაღი პროდუქციის წარმოებას, შემოსავლების ზრდას და ქვეყნის ეკონომიკის განვითარებას“, - აღნიშნა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა.
კონფერენციაზე, ქართველმა სპეციალისტებმა წარმოადგინეს სამეცნიერო ნაშრომები თემებზე: საქართველოში წვრილფეხა რქოსანი პირუტყვის ჭირის დიაგნოსტირების თანამედროვე მეთოდები; საქართველოში თურქულის დაავადების დიაგნოსტირება/კვლევები ეპიდზედამხედველობის მიზნით; საქართველოში ბრუცელოზის შემთხვევების შეფასება.
ყოველწლიურ კონფერენციაზე, ვეტერინარიის სფეროში მოღვაწე მსოფლიოს წამყვანი მეცნიერ-თანამშრომლები და სპეციალისტები ერთმანეთს აცნობენ ცხოველთა დაავადებებთან ბრძოლის თანამედროვე მიღწევებს და უზიარებენ გამოცდილებას ცხოველთა განსაკუთრებით საშიში დაავადებების დიაგნოსტირებისა და მკურნალობის ეფექტიან მეთოდებზე. ღონისძიების ფარგლებში, განიხილება ყველა ის აქტუალური თემა და საკითხი, რომელიც ცხოველთა ბაქტერიულ, ვირუსულ და ინფექციურ დაავადებებს ეხება და განსაკუთრებით საყურადღებოა.
წელს, საერთაშორისო კონფერენციამ საიუბილეო თარიღი, დაარსებიდან 100 წლის იუბილე აღნიშნა.