ახალი ამბები
ENI SEIS II აღმოსავლეთ პარტნიორობის პროექტის მმართველი კომიტეტის მე - 4 შეხვედრა გაიმართა
კოპენჰაგენში, ევროპის გარემოს სააგენტოში, ევროპის სამეზობლო ინსტრუმენტის ერთიანი გარემოსდაცვითი საინფორმაციო სისტემის (ENI SEIS II) აღმოსავლეთ პარტნიორობის პროექტის შედეგების შეჯამების და სამომავლო პრიორიტეტების განსაზღვრის მიზნით, მმართველი კომიტეტის რიგით მე-4 შეხვედრა გაიმართა.
შეხვედრაზე განისაზღვრა ერთიანი გარემოსდაცვითი საინფორმაციო სისტემის SEIS-ის მანდატი და ENI SEIS II აღმოსავლეთ პარტნიორობის პროექტის მიზნების და ამოცანების ურთიერთკავშირი, რაც მნიშვნელოვანია შესაბამის საერთაშორისო პროექტებთან და პარტნიორებთან 2019-2020 წლებში დარჩენილი აქტივობების ერთობლივად და ეფექტიანად განხორციელებისთვის.
კომიტეტის შეხვედრას ექვსი პარტნიორი ქვეყნის (აზერბაიჯანი, ბელორუსია, მოლდოვა, საქართველო, სომხეთი, უკრაინა) ეროვნულ პასუხისმგებელ პირთან ერთად, რომლებიც აღნიშნული ქვეყნების გარემოს დაცვის სამინისტროსა და ეროვნული სტატისტიკის სამსახურების წარმომადგენლები არიან, ევროკომისიის (სამეზობლოს და გაფართოების საკითხებზე მოლაპარაკებების გენერალური დირექტორატის - DG NEAR), გაეროს ევროპის ეკონომიკური კომისიის (UNECE), გაეროს გარემოსდაცვითი პროგრამის (UN Environment) ზოი გარემოსდაცვითი ქსელის (Zoinet) და ევროპის გარემოს სააგენტოს (EEA) წარმომადგენლები ესწრებოდნენ.