ახალი ამბები
დათვების თავშესაფრის საკვები პროდუქტით მომარაგებასთან დაკავშირებით თანამშრომლობის მემორანდუმი გაფორმდა
გარემოს დაცვისა და სოფლის მეურნეობის სამინისტროს ინიციატივით, ცხვარიჭამიაში მდებარე დათვების თავშესაფარს სხვადასხვა სახის დაზიანებულ საკვებ პროდუქტებს კომპანია „კარფური“ ყოველდღიურად მიაწვდის. აღნიშნულის შესახებ, გარემოს დაცვისა და სოფლის მეურნეობის მინისტრის მოადგილემ, იური ნოზაძემ, დათვების თავშესაფრის დამფუძნებელმა, სოსო ჯიქურიშვილმა და კომპანია „კარფური“ გენერალურმა მენეჯერმა, ქრისტოფ ორსემ თანამშრომლობის მემორანდუმს მოაწერეს ხელი.
მემორანდუმი მიზნად ისახავს ბრაკონიერების, ასევე მოსახელობის ტყვეობიდან დახსნილი საქართველოს „წითელ ნუსხაში“ შეტანილი მურა დათვების დაცვას და მათი საცხოვრებელი პირობების გაუმჯობესებას.
„მისასალმებელია, რომ კომპანია „კარფური“ გამოეხმაურა ჩვენი სამინისტროს ინიციატივას, რომლის ფარგლებშიც დათვების თავშესაფარს ნარჩენ პროდუქტს სიმბოლურ ფასად მიაწვდის. მინდა, განსაკუთრებული მადლობა გადავუხადო თავშესაფრის შექმნის ინიციატორს, სოსო ჯიქურაშვილს. ვიმედოვნებ, რომ აღნიშნული მემორანდუმი ხელს შეუწყობს იმ მანკიერი პრაქტიკის დასრულებას, რომელიც წლების განმავლობაში ქვეყანაში ხორციელდებოდა“, - აღნიშნა გარემოს დაცვისა და სოფლის მეურნეობის მინისტრის მოადგილემ, იური ნოზაძემ.
როგორც ქრისტოფ ორსემ აღნიშნა, კომპანია „კარფური“ მზადყოფნას გამოთქვამს ცხოველთა უფლებების დაცვის მიმართულებით გარემოს დაცვისა და სოფლის მეურნეობის სამინისტროს წამოწყებულ ინიციატივას შეუერთდეს და ერთობლივი აქტივობებით, ხელი შეუწყოს თავშესაფარში მყოფი ტყვეობიდან დახსნილი დათვების საცხოვრებელი პირობების გაუმჯობესებას.