ახალი ამბები
გარემოს დაცვისა და სოფლის მეურნეობის მინისტრმა, ლევან დავითაშვილმა საქართველოს ტერიტორიაზე გახშირებულ ხანძრებთან დაკავშირებით ბრიფინგი გამართა.
„კლიმატის ცვლილების ერთ-ერთი მძიმე შედეგი გახშირებული ხანძრებია, რაც შესამჩნევია საქართველოშიც. 2020 წლის 1 მარტიდან დღემდე, ტყის ეროვნული სააგენტოს მართვას დაქვემდებარებულ ტყის ფონდში ხანძრის 43 შემთხვევა დაფიქსირდა და ხანძრის გავრცელების საერთო ფართობმა 546 ჰექტარი შეადგინა. მინდა მადლობა გადავუხადო შსს-ს, საგანგებო სიტუაციების მართვის სააგენტოს და მის ხელმძღვანელობას და თითოეულ თანამშრომელს, რომელიც სალიკვიდაციო სამუშაოებში იღებდა მონაწილეობას“, - განაცხადა ლევან დავითაშვილმა.
2020 წლის 1 მარტიდან დღემდე, საქართველოს ტერიტორიაზე გავრცელებული ტყის ხანძრების შესახებ არსებული ინფორმაცია რეგიონების მიხედვით:
კახეთი 18 კერა - 168 ჰექტარი
სამცხე-ჯავახეთი 1 კერა 1 ჰექტარი
რაჭა-ლეჩხუმი-ქვემო სვანეთი 3 კერა - 60 ჰექტარი
ქვემო ქართლი 5 კერა - 65 ჰექტარი
შიდა ქართლი 2 კერა - 15 ჰექტარი
გურია 4 კერა - 8.5 ჰექტარი
იმერეთი 6 კერა - 16 ჰექტარი
სამეგრელო-ზემო სვანეთი 4 კერა - 200 ჰექტარი (ფართობის სიდიდის მიუხედავად ხანძარი მხოლოდ ქვეტყეზე და ბუჩქნარზე გადავიდა)
მცხეთა-მთიანეთი 1 კერა - 10 ჰექტარი.
ხანძრის ორი შემთხვევა დაფიქსირდა დაცულ ტერიტორიებზე - ბორჯომ-ხარაგაულის ეროვნული პარკის ტერიტორიაზე 800-100 კვ/მ-ზე და ქობულეთის აღკვეთილში - 2,5-3 ჰა ფართობზე. ბორჯომ-ხარაგაულის ეროვნული პარკში ხანძარი ლიკვიდირებულია; ქობულეთის აღკვეთილში შესაბამისი სამსახურები მუშაობენ.