ახალი ამბები
„გლობალური კლიმატური ცვლილებებიდან გამომდინარე, ნალექის რაოდენობა წელს საქართველოში მნიშვნელოვნად, 20-40 პროცენტითაა შემცირებული. კლიმატის ცვლილების ერთ-ერთი მძიმე შედეგი გახშირებული ხანძრებია, რაც შესამჩნევია საქართველოშიც
ხანგრძლივი უნალექო პერიოდის გამო, რომელიც მთელი ზამთრის განმავლობაში შენარჩუნდა, ტყეებში ხანძრების რისკი განსაკუთრებით მომატებულია - გამომშრალია ნიადაგი და ბალახეული საფარი, რაც როგორც ხანძრის წარმოშობას, ასევე მის სწრაფ გავრცელებას უწყობს ხელს.
2020 წლის 1 მარტიდან დღემდე, ტყის ეროვნული სააგენტოს მართვას დაქვემდებარებულ ტყის ფონდში ხანძრის 43 შემთხვევა დაფიქსირდა და ხანძრის გავრცელების საერთო ფართობმა 546 ჰექტარი შეადგინა. დაფიქსირებული 43 შემთხვევიდან, უმეტეს ნაწილში ცეცხლის კერა ლიკვიდირებულია, ხოლო დანარჩენ შემთხვევებში, ხანძარი ლოკალიზებულია და სალიკვიდაციო სამუშაოები გრძელდება.
ტყის ხანძრებთან ბრძოლის ღონისძიებებში ჩართულია ეროვნული სატყეო სააგენტოს 150-მდე მეტყევე სპეციალისტი და დაახლოებით 1000-ზე მეტი მეხანძრე-მაშველი, ასევე სახანძრო ტექნიკა და სასაზღვრო პოლიციის 4 ვერტმფრენი.“ - ლევან დავითაშვილი