ახალი ამბები
სოლომონ პავლიაშვილი ბოლნისის მუნიციპალიტეტში იმყოფებოდა
საქართველოს გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი ბოლნისის მუნიციპალიტეტში იმყოფებოდა. მუნიციპალიტეტის მერთან, დავით შერაზადიშვილთან ერთად, მინისტრის მოადგილე სოფელ ნახიდურში, საექსპორტო კარტოფილის შემკრებ პუნქტში, პროდუქტის რეალიზაციის პროცესს გაეცნო. წელს, აღებული საადრეო კარტოფილის მოსავალი, დაახლოებით, 15 000 ტონამდეა, საიდანაც 3000 ტონა ექსპორტირებულია. მუნიციპალიტეტის სოფლებში, სავანეთსა და ხატისოფელში, სოლომონ პავლიაშვილმა სახელმწიფო პროგრამის ფინანსური მხარდაჭერით შექმნილი სამაცივრო მეურნეობები დაათვალიერა.
ბოლნისის მუნიციპალიტეტში შეხვედრა გაიმართა ადგილობრივ მეღვინეებთანაც, რომელსაც მინისტრის მოადგილესთან და ბოლნისის მერთან ერთად, ღვინის ეროვნული სააგენტოს თავმჯდომარე, ლევან მეხუზლა ესწრებოდა. შეხვედრაზე მუნიციპალიტეტში მეღვინეობის განვითარებისთვის საჭირო პროექტებისა და სამომავლო გეგმების შესახებ იმსჯელეს. ხელისუფლების წარმომადგენლებმა თანამედროვე სტანდარტებით გაშენებული ვენახი და საოჯახო მარანი დაათვალიერეს.
„მნიშვნელოვანია, რომ ფერმერებს პროდუქციის რეალიზაციის პრობლემა არ შეექმნათ. ყველაფერს ვაკეთებთ, რომ ლოგისტიკური მომსახურება იყოს გამართული. უნდა აღინიშნოს, რომ რეგიონს მევენახეობის განვითარების დიდი პოტენციალი აქვს. ბოლნისის მუნიციპალიტეტში ყურძნის უნიკალური ჯიშებია. მისასალმებელია, რომ კერძო სექტორის ინიციატივით, „ბოლნისი“ ქართული ღვინის ადგილწარმოშობის დასახელებად დარეგისტრირდა, რაც ხელს შეუწყობს ბოლნური ღვინის კონკურენტუნარიანობის ზრდას, როგორც ქვეყნის შიგნით, ისე საექსპორტო ბაზრებზე“, - განაცხადა გარემოს დაცვისა და სოფლის მეურნეობის მინისტრის მოადგილემ.
სოლომონ პავლიაშვილმა, სოფელ დისველში მარცვლეული კულტურების მწარმოებელ ფერმერებთანაც გამართა შეხვედრა, პროგრამის ,,დანერგე მომავალი“ ფარგლებში გაშენებული ბიოვენახი და მრავალწლოვანი კულტურების ბაღები დაათვალიერა.
ბოლნისის მუნიციპალიტეტში მინისტრის მოადგილესთან ერთად იმყოფებოდნენ საქართველოს მელიორაციის დირექტორის მოადგილე გენადი კერძევაძე და სოფლისა და სოფლის მეურნეობის განვითარების სააგენტოს დირექტორის მოადგილე გიორგი ჯიბლაძე.