საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

ამობეჭდვა

გაზიარება

იური ნოზაძე მდინარე ყვირილას წყლის გაუმჯობესების პროექტის პრეზენტაციას დაესწრო

გარემოს დაცვისა და სოფლის მეურნეობის მინისტრის მოადგილე იური ნოზაძე, იმერეთის რეგიონში სახელმწიფო რწმუნებულთან, ზვიად შალამბერიძესთან და მაჟორიტარ დეპუტატთან, სულხან მახათაძესთან ერთად ჭიათურაში, მდინარე ყვირილას წყლის ხარისხის გაუმჯობესების პროექტის პრეზენტაციას დაესწრო.

„გარემოს დაცვის მიმართულებით მსგავსი პროექტების განხორციელება განსაკუთრებით მნიშვნელოვანია. მისასალმებელია, რომ კომპანია „ჯორჯიან მანგანეზი“ გარემოსდაცვითი პოლიტიკის ფარგლებში განახორციელებს მასშტაბურ პროექტს, რომელიც  წარმოებაში გამოყენებული წყლის გაფილტვრას ითვალისწინებს, რაც მდინარე ყვირილას წყლის ხარისხს საგრძნობლად გააუმჯობესებს. იმედი გვაქვს, კომპანია აქტიურად გააგრძელებს პროექტს, რათა გარემოს დაბინძურება მინიმუმადე შემცირდეს“, - აღნიშნა  გარემოს დაცვისა და სოფლის მეურნეობის მინისტრის მოადგილემ, იური ნოზაძემ.

გარემოსდაცვითი პოლიტიკის ფარგლებში, მდინარე ყვირილას წყლის ხარისხის გაუმჯობესების საპილოტე პროექტს „ჯორჯიან მანგანეზი“ ჭიათურის 29-ე ფაბრიკის ტერიტორიაზე ახორციელებს. ახალი ტექნოლოგიების დანერგვის შემდეგ, „ჯორჯიან მანგანეზის“ საწარმოო პროცესს გარემოსთან შემხებლობა აღარ ექნება - წარმოებაში გამოყენებული წყალი მდინარე ყვირილაში აღარ ჩაედინება, წყლისა და შლამის სეპარაცია ლოკალურ დონეზე ხდება. რეცხვის შედეგად მიღებულ შლამს,  გაშრობის შემდეგ, კომპანია სხვადასხვა დანიშნულებით იყენებს. აღსანიშნავია, რომ მსგავსი პროექტი საქართველოში პირველად განხორციელდა.

კომპანია „ჯორჯიან მანგანეზის“ სპეციალური მმართველის, ნიკოლოზ ჩიქოვანის განმარტებით, კომპანია უცხოელ სპეციალისტებთან მუშაობს, რომ სამწლიანი გეგმის ფარგლებში,  მსგავსი პროექტი განხორციელდეს მადნის გადამამუშავებელ ყველა ობიექტსა და ქარხანაში, რაც საბოლოოდ, მდინარე ყვირილას დაბინძურებისგან აბსოლუტურ დაცვას განაპირობებს. 

იმერეთში სახელმწიფო რწმუნებულის, ზვიად შალამბერიძის განცხადებით,  აღნიშნული პროექტის განხორციელება რამდენიმე ათეული წლის განმავლობაში არსებულ პრობლემას გადაჭრის. სახელმწიფოსა და კერძო სექტორის  ერთობლივი მუშაობის შედეგად, მდინარე ყვირილა აღარ დაბინძურდება, წყლის ხარისხი და ზოგადად, მისი ეკოსისტემა მნიშვნელოვნად გაუმჯობესდება.