ახალი ამბები
გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი საქართველოს მეცნიერებათა ეროვნული აკადემიის აკადემიკოსად აირჩიეს
სოლომონ პავლიაშვილს საქართველოს მეცნიერებათა ეროვნული აკადემიის საერთო კრებამ აგრარული მეცნიერებების მიმართულებით აკადემიკოსის სტატუსი მიანიჭა.სოლომონ პავლიაშვილმა უმაღლესი სამეცნიერო სტატუსი საქართველოში აგროეკოსისტემების მდგრადი მართვის განვითარებაში შეტანილი წვლილისთვის მიიღო.
აღსანიშნავია სოლომონ პავლიაშვილის სამეცნიერო წვლილი გარემოს დაცვის, ნარჩენების ეფექტიანი გამოყენების, ცირკულარული მოდელების დანერგვის, ორგანული სოფლის მეურნეობის, საქართველოს სატრანსპორტო სისტემის, წარმოების აგროსატრანსპორტო მომსახურების, სოფლის მეურნეობის პროდუქციის სწრაფად და უდანაკარგოდ გადაზიდვის და საქართველოს აგროსატრანზიტო ფუნქციის ეფექტიანობის ამაღლების მეცნიერული საკითხების დამუშავებაში, ცირკულარული მოდელების კვლევისა და დანერგვის საქმეში.
სოლომონ პავლიაშვილი 1982 წლიდან ჩართულია სამეცნიერო საქმიანობაში. იგი გახლავთ საქართველოს ეკონომიკურ მეცნიერებათა აკადემიის ვიცე-პრეზიდენტი, ეკონომიკის მეცნიერებათა დოქტორი, პროფესორი, საქართველოს ეკონომიკურ მეცნიერებათა აკადემიის აკადემიკოსი. მას, როგორც ახალგაზრდა დოქტორს, 1999 წელს, პრეზიდენტის პირველი ხარისხის სამეცნიერო სტიპენდია მიენიჭა; 2019 წელს, სოლომონ პავლიაშვილმა აკადემიკოს პაატა გუგუშვილის პრემია მიიღო.
გამოქვეყნებული აქვს 14 მონოგრაფია და ასამდე სამეცნიერო პუბლიკაცია მაკროეკონომიკის, აგრარული მეცნიერებების, ეკოსისტემების მდგრადობის, გარემოს დაცვის, საერთაშორისო ეკონომიკური ურთიერთობებისა და სხვა აქტუალურ საკითხებზე ადგილობრივ და საერთაშორისო სამეცნიერო ჟურნალებში.
სოლომონ პავლიაშვილი, სახელმწიფო სამსახურის პარალელურად, აქტიურად მუშაობს სამეცნიერო-პედაგოგიური მიმართულებით.