ახალი ამბები
გარემოს დაცვისა და სოფლის მეურნეობის მინისტრი ლევან დავითაშვილი საერთაშორისო ორგანიზაცია კავკასიის ბუნების ფონდის (CNF) აღმასრულებელ დირექტორს, თობიას მიუნხმაიერს შეხვდა.
შეხვედრაზე მხარეებმა საქართველოში გარემოსდაცვითი მიმართულებით წარმატებული თანამშრომლობა შეაფასეს და CNF-თან სამომავლო პარტნიორობის შესაძლებლობები განიხილეს.
ლევან დავითაშვილმა CNF-ის აღმასრულებელ დირექტორს დაცული ტერიტორიებისა და ბიომრავალფეროვნების დაცვის მიმართულებით გახორციელებული აქტივობები და მიღწეული შედეგები გააცნო. მინისტრმა აღნიშნა, რომ ბოლო პერიოდში, პანდემიით გამოწვეული რთული ეკონომიკური მდგომარეობის მიუხედავად, დაცული ტერიტორიების ფართობი საგრძნობლად გაიზარდა და ტერიტორიებზე არსებული ტურისტული ინფრასტრუქტურა განახლდა.
როგორც შეხვედრაზე თობიას მიუნხმაიერმა განაცხადა, CNF განაგრძობს საქართველოში დაცული ტერიტორიების სისტემის განვითარების მხარდაჭერას, ბიომრავალფეროვნების მონიტორინგის და რეინჯერის ინსტიტუტის გაძლიერების ხელშეწყობას.
შეხვედრას გარემოს დაცვისა და სოფლის მეურნეობის მინისტრის მოადგილე ნინო თანდილაშვილი და სამინისტროს სისტემაში შემავალი შესაბამისი უწყებების წარმომადგენლები ესწრებოდნენ.