ახალი ამბები
ჰაერის კონვენციის აღმასრულებელი ორგანოს 41-ე სხდომაზე, ბიუროს თანათავმჯდომარედ ნოე მეგრელიშვილი აირჩიეს
საქართველოს გარემოს დაცვისა და სოფლის მეურნეობის სამინისტროს გარემოსა და კლიმატის ცვლილების დეპარტამენტის ატმოსფერული ჰაერის სამმართველოს უფროსი ნოე მეგრელიშვილი, შორ მანძილებზე ჰაერის ტრანსსასაზღვრო დაბინძურების შესახებ კონვენციის (ჰაერის კონვენცია) აღმასრულებელი ორგანოს 41-ე სხდომაზე, აღმასრულებელი ორგანოს ბიუროს თანათავმჯდომარედ ორი წლის ვადით აირჩიეს.
ბიუროს თანათავმჯდომარეებად ასევე არჩეულები არიან ამერიკის შეერთებული შტატებისა და ნიდერლანდების სამეფოს წარმომადგენლები, ხოლო თავმჯდომარედ - შვედეთის წარმომადგენელი.
აღსანიშნავია, რომ კონვენციის წინაშე აღებული ნებაყოფლობითი ვალდებულებების რაოდენობითა და მათი შესრულების ხარისხით საქართველო ერთ-ერთი გამორჩეული ქვეყანაა. ბოლო წლებში, ატმოსფერული ჰაერის ხარისხის მონიტორინგისა და დაცვის კუთხით გადადგმული უმნიშვნელოვანესი ნაბიჯები საერთაშორისო დონეზეც აღინიშნება, რაც ხელს უწყობს ქვეყნის პრესტიჟის და დონორთა მხრიდან მხარდაჭერის ზრდას.
კონვენციის აღმასრულებელი ორგანოს მაღალ თანამდებობაზე საქართველოს წარმომადგენლის დანიშვნა ხელს შეუწყობს საქართველოში ჰაერის ხარისხის მართვის ევროპულ საუკეთესო პრაქტიკასთან მაქსიმალურ მიახლოებას.
შორ მანძილებზე ჰაერის ტრანსსასაზღვრო დაბინძურების შესახებ კონვენციის (ჰაერის კონვენცია) აღმასრულებელი ორგანოს 41-ე სხდომა მიმდინარე წლის 6-8 დეკემბერს, შვეიცარიის კონფედერაციაში, ქალაქ ჟენევაში გაიმართა.