ახალი ამბები
გარემოს დაცვისა და სოფლის მეურნეობის მინისტრი ოთარ შამუგია ევროპის საბჭოს ადამიანის უფლებათა კომისარ დუნია მიატოვიჩს შეხვდა.
შეხვედრაზე მინისტრმა აღნიშნა, რომ ადამიანის უფლებების დაცვა, მათ შორის, ჯანსაღი გარემო პირობების უზრუნველყოფით, სახელმწიფოს პრიორიტეტია. ოთარ შამუგიამ ევროსაბჭოს კომისარს გარემოს დაცვის მიმართულებით განხორციელებული მნიშვნელოვანი რეფორმები და ღონისძიებები გააცნო.
„სამინისტროს ძალისხმევით, 2017 წლიდან, გარემოზე ზემოქმედების შეფასების სისტემამ არსებითი პოზიტიური ცვლილებები განიცადა, რაც უზრუნველყოფს ყველა იმ საქმიანობის თუ სტრატეგიული დოკუმენტის შეფასებას, რომელსაც გავლენა შეიძლება ჰქონდეს ადამიანის სიცოცხლესა და ჯანმრთელობაზე. გარემოსდაცვითი მმართველობისა და გარემოსდაცვითი სტანდარტების გაუმჯობესება ჩვენი მოქალაქეების ჯანმრთელობისათვის უვნებელ გარემოში ცხოვრების უფლების ერთ-ერთი უპირველესი წინაპირობაა“, - განაცხადა მინისტრმა.
დუნია მიატოვიჩმა საქართველოს ევროსაბჭოს მინისტრთა კომიტეტის თავმჯდომარეობის დროს პრიორიტეტულ მიმართულებად გარემოს დაცვისა და ადამიანის უფლებების გამოცხადება და საქართველოს მიერ გაწეული საქმიანობა და მიღწეული შედეგები დადებითად შეაფასა.
შეხვედრაზე ოთარ შამუგიამ ყურადღება გაამახვილა „გარემოსდაცვითი შეფასების კოდექსზე“, რომლითაც საქართველო ევროკავშირის კანონმდებლობას დაუახლოვდა. კანონმდებლობაში სრულად აისახა ორჰუსის კონვენციის მოთხოვნები, რაც გარემოსდაცვითი გადაწყვეტილებების მიღების პროცესში საზოგადოების მაქსიმალური ჩართულობის უზრუნველყოფას გულისხმობს. შეხვედრაზე აღინიშნა, რომ საქართველო აქტიურად მუშაობს ადამიანის გარემოსდაცვითი უფლებების შესახებ მოსახლეობის ცნობიერების ამაღლების მიმართულებით. დაწყებულია გარემოსდაცვითი განათლების დანერგვა სკოლამდელი ასაკიდან.
მინისტრმა ისაუბრა გარემოსდაცვითი შეფასების პორტალზე, რომელიც ქვეყანაში გამჭირვალეობის მაღალი სტანდარტების დანერგვას ემსახურება. საუბარი შეეხო ატმოსფერული ჰაერის ხარისხის პორტალსაც, რომლის მეშვეობით ატმოსფერული ჰაერის ხარისხის მონიტორინგის შედეგები საზოგადოებას მაქსიმალურად ოპერატიულად მიეწოდება.
„ძალიან მნიშვნელოვანია, რომ ქვეყანაში დაინერგა ახალი გარემოსდაცვითი პასუხისმგებლობის მექანიზმი, რომელიც სრულად არის შესაბამისობაში ევროკავშირის კანონმდებლობასთან და ეფუძნება „დამაბინძურებელი იხდის პრინციპს. ასევე, მივიღეთ ტყის ახალი კოდექსი, რომელიც საქართველოს ტყის ბიოლოგიური მრავალფეროვნების დაცვას შეუწყობს ხელს და მნიშვნელოვან წვლილს შეიტანს კლიმატის ცვლილების გავლენის შემცირებაში“, - აღნიშნა ოთარ შამუგიამ.