ახალი ამბები
საქართველოს ეკონომიკის ცირკულარობის შეფასების პროექტის შესახებ შეხვედრა გაიმართა
გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა და შვედეთის ელჩის მოადგილემ საქართველოში, ერიკ ილესმა საქართველოს ეკონომიკის ცირკულარობის შეფასების პროექტის მესამე პლენარულ შეხვედრაში მიიღეს მონაწილეობა.
შეხვედრაზე საქართველოს ეკონომიკის ცირკულარობის დონის შეფასებისათვის განხორციელებული სამუშაოები და ქვეყანაში ცირკულარობის განვითარების პერსპექტივები განიხილეს. შეფასების შედეგად შეხვედრაზე წარმოდგენილი მონაცემები ეყრდნობა საქართველოს სხვადასხვა უწყების ბაზებში არსებული სტატისტიკური მონაცემების ანალიზსა და სამთავრობო უწყებებთან, მუნიციპალიტეტებთან და ბიზნესის წარმომადგენლებთან გამართულ კონსულტაციებს. შეხვედრაზე ასევე განიხილეს ცირკულარულ ეკონომიკასა და კლიმატის ცვლილებებს შორის კავშირი და ამ კუთხით არსებული ტენდენციები.
შეხვედრა პროექტის „საქართველოს ეკონომიკის ცირკულარობის შეფასება“ ფარგლებში, გარემოს დაცვისა და სოფლის მეურნეობის სამინისტროსა და საქართველოს ბუნების მკვლევართა კავშირის „ორქისი“ ორგანიზებით გაიმართა. პროექტი შვედეთის მთავრობის დაფინანსებით ხორციელდება და მისი მიზანი ქვეყანაში ცირკულარულ ეკონომიკაზე გადასვლის პროცესის ხელშეწყობაა.
შეხვედრაზე პრეზენტაცია ბუნების მკვლევართა კავშირის საერთაშორისო კონსულტანტმა დარიუს პრასეკმა გააკეთა. 2021 წლის მარტში, ცირკულარობის შეფასების პროცესის დაწყებამდე, საქართველოს მთავრობამ უწყებათშორისი სამუშაო ჯგუფი (საქართველოს მთავრობის საკოორდინაციო საბჭო) ჩამოაყალიბა, რომელშიც შედიან სხვადასხვა სახელმწიფო უწყების წარმომადგენლები, რათა საკვანძო უწყებები ადრეულ ეტაპზევე ჩაერთონ პროცესში.