ახალი ამბები
სოლომონ პავლიაშვილმა საქართველოს პარლამენტში, ინერტული ნარჩენების მართვის პოლიტიკის განსაზღვრის, ინერტულ ნარჩენებთან დაკავშირებული გამოწვევებისა და მათი გადაჭრის გზების საკითხებზე ისაუბრა
გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა საქართველოს პარლამენტში, გარემოს დაცვისა და ბუნებრივი რესურსების კომიტეტის სხდომაზე, ინერტული ნარჩენების მართვის პოლიტიკის განსაზღვრის, ინერტულ ნარჩენებთან დაკავშირებული გამოწვევებისა და მათი გადაჭრის გზების საკითხებზე ისაუბრა.
როგორც მინისტრის მოადგილემ აღნიშნა, ამ ეტაპზე არ არსებობს ინერტული ნარჩენების მართვის სახელმძღვანელო დოკუმენტი, რომელიც შესაბამისობაში იქნება ნარჩენების მართვის კოდექსთან და თანამედროვე საუკეთესო გამოცდილებასთან.
„მოგეხსენებათ, გვაქვს ნარჩენების მართვის 2016-2030 წლების ეროვნული სტრატეგია, ასევე, 2022-2025 წლების ეროვნული სამოქმედო გეგმა. სამინისტრო გეგმავს ცვლილებები განახორციელოს ინერტული ნარჩენების მართვის მიმართულებით და ცალკე თავი დაუთმოს აღნიშნულ სტრატეგიასა და სამოქმედო გეგმაში ინერტული ნარჩენების მართვას. ინერტული ნარჩენების ცირკულარულ ეკონომიკაში გამოყენება სარგებლის მომტანი იქნება, შესაბამისად, ჩვენი ამოცანაა, რაც შეიძლება ნაკლები ინერტული ნარჩენი აღმოჩნდეს ნაგავსაყრელზე და მათი გადამუშავება-რეციკლირება მოხდეს“, - განაცხადა სოლომონ პავლიაშვილმა.
ინერტული ნარჩენების მდგრადი მართვის შესახებ თემატური მოკვლევის ჩატარების მიზნით, გარემოს დაცვისა და ბუნებრივი რესურსების კომიტეტთან შეიქმნა სამუშაო ჯგუფი, რომლის შემადგენლობა საქართველოს პარლამენტის წევრებით განისაზღვრა.
თემატური მოკვლევის მიზანს ინერტული ნარჩენების მართვასთან დაკავშირებული პრობლემების იდენტიფიცირება, არსებული რეგულაციების და პრაქტიკის ანალიზი და შესაბამისი სტრუქტურების მუშაობის შეფასება წარმოადგენდა. შედეგად, თემატური მოკვლევის სამუშაო ჯგუფმა შესაბამისი რეკომენდაციები შეიმუშავა.