ახალი ამბები
იური ნოზაძე კონფერენციის „მსოფლიო მევენახეობა-მეღვინეობა: ისტორია, თანამედროვეობა და მდგრადი განვითარების პერსპექტივები“ გახსნის ღონისძიებას დაესწრო
გარემოს დაცვისა და სოფლის მეურნეობის მინისტრის მოადგილე იური ნოზაძე საერთაშორისო სამეცნიერო კონფერენციის „მსოფლიო მევენახეობა-მეღვინეობა: ისტორია, თანამედროვეობა და მდგრადი განვითარების პერსპექტივები“ გახსნის ღონისძიებას დაესწრო.
კონფერენცია საქართველოს ტექნიკურ უნივერსიტეტის აგრარული მეცნიერებების და ბიოსისტემების ინჟინერინგის, ბიზნესტექნოლოგიების და მთის მდგრადი განვითარების ფაკულტეტების, ასევე „იტერ ვიტის საქართველოსა“ და მევენახეობა-მეღვინეობის სამეცნიერო-სასწავლო ცენტრის ორგანიზებით გაიმართა და უნივერსიტეტის დაარსებიდან 100 წლისთავს მიეძღვნა.
„ მევენახეობა-მეღვინეობა საქართველოს წამყვანი დარგია. საერთაშორისო სამეცნიერო კონფერენცია „მსოფლიო მევენახეობა-მეღვინეობა: ისტორია, თანამედროვეობა და მდგრადი განვითარების პერსპექტივები“ მნიშვნელოვანია მსოფლიო მევენახეობა-მეღვინეობის დარგში გამოცდილების გაზიარების, ახალი კონტაქტების დამყარებისა და სამეცნიერო მიმართულებით საერთაშორისო ურთიერთობების გაღრმავების მიზნით, რომელიც ხელს შეუწყობს ქართული ვაზისა და ღვინის კულტურისა თუ ენოგასტრონომიული კულტურის პოპულარიზაციას“, - განაცხადა იური ნოზაძემ.
კონფერენციას ღვინის ეროვნული სააგენტოს, სამეცნიერო-კვლევითი ცენტრის, საქართველოს სოფლის მეურნეობის მეცნიერებათა აკადემიის, ასევე, იტალიის, ესპანეთის და ისრაელის წარმომადგენლები ესწრებოდნენ.
ღონისძიების დასასრულს, მევენახეობა-მეღვინეობაში ერთობლივი საგანმანათლებლო და კვლევითი პროექტების განხორციელების მიზნით, საქართველოსა და ისრაელის უნივერსიტეტებს შორის თანამშრომლობის მემორანდუმი გაფორმდა.