ახალი ამბები
სოლომონ პავლიაშვილი ქიმიური ნივთიერებების მართვასთან დაკავშირებული საკითხების განხილვას დაესწრო
ქიმიური ნივთიერებების მართვასთან დაკავშირებული საკითხები განიხილეს თემატურ სემინარზე, რომელსაც გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო.
სოლომონ პავლიაშვილმა მადლობა გადაუხადა ჩეხეთის მთავრობას, ჩეხეთის განვითარების სააგენტოს ქვეყანაში ქიმიური ნივთიერებების მართვის საკანონმდებლო ბაზის შექმნისა და სრულყოფის მიმართულებით გაწეული მხარდაჭერისთვის და ყურადღება ევროკავშირთან ასოცირების ხელშეკრულებით ნაკისრი ვალდებულებების შესრულების მნიშვნელობაზე გაამახვილა.
მინისტრის მოადგილემ ვრცლად ისაუბრა ქვეყნისთვის ქიმიური ნივთიერებების მართვის სისტემის შექმნის საჭიროებაზე და ხაზგასმით აღნიშნა პარტნიორი ქვეყნების გამოცდილების გაზიარების მნიშვნელობის საკითხი.
საუბარი შეეხო ქიმიური ნივთიერებების მწარმოებლების, იმპორტიორების, დისტრიბუტორებისა და მომხმარებლებისთვის დაკისრებული ახალი ვალდებულებების საკითხებს, ქიმიური ნივთიერებების მართვის პრინციპებსა და სახელმწიფო დაწესებულებების კომპეტენციებს.
სემინარი ჩეხეთის განვითარების სააგენტოს მხარდაჭერით, პროექტის „ქიმიური ნივთიერებების სათანადო მართვის შესაძლებლობების გაძლიერება - ქიმიური ნივთიერებების და ნარევების კლასიფიკაციის, ეტიკეტირებისა და შეფუთვის შესახებ და ქიმიური ნივთიერებების რეგისტრაციის, შეფასების, ავტორიზაციისა და შეზღუდვების შესახებ რეგულირების განხორციელება“ ფარგლებში გაიმართა.
ქართველი და ჩეხი ექსპერტების მიერ გამართულ სემინარს გარემოს დაცვისა და სოფლის მეურნეობის სამინისტროს შესაბამისი სამსახურებისა და უწყების ხელმძღვანელ პირებთან ერთად, შრომის, ჯანმრთელობისა და სოციალური დაცვის სამინისტროს, ეკონომიკისა და მდგრადი განვითარების სამინისტროს, ასევე, საგანგებო სიტუაციების მართვის სამსახურის წარმომადგენლები ესწრებოდნენ.