ახალი ამბები
გარემოს დაცვისა და სოფლის მეურნეობის სამინისტროში თბილისის აგლომერაციის ატმოსფერული ჰაერის ხარისხის გაუმჯობესების ხელშემწყობი ჯგუფის პირველი სამუშაო შეხვედრა გაიმართა.
სამუშაო შეხვედრის ფარგლებში, პროექტის ექსპერტებმა თბილისში ატმოსფერული ჰაერის დაბინძურების ხარისხის დასადგენად ჩატარებული საბაზისო კვლევის შედეგები წარმოადგინეს.
მნიშვნელოვანია, რომ თბილისის აგლომერაციისთვის ატმოსფერული ჰაერის ხარისხის მართვის გეგმის შემუშავება, საქართველო-ევროკავშირს შორის ასოცირების შესახებ შეთანხმებისა და ეროვნული კანონმდებლობის მოთხოვნების შესაბამისად დაიწყო, რომელიც დედაქალაქში სათანადო, შედეგზე ორიენტირებული ღონისძიებების გატარებით ატმოსფერული ჰაერის დაბინძურების შემცირებას ითვალისწინებს.
აღსანიშნავია, რომ დოკუმენტის შემუშავება ევროკავშირის ტექნიკური მხარდაჭერის პროექტის „გარემოს დაცვისა და კლიმატის ცვლილების წინააღმდეგ ბრძოლის მხარდაჭერა“ ფარგლებში, ქართველი და ევროპელი ექსპერტების მონაწილეობით მიმდინარეობს.
შეხვედრას გარემოს დაცვისა და სოფლის მეურნეობის სამინისტროსა და მის სისტემაში შემავალი შესაბამისი უწყების წარმომადგენლებთან ერთად, ეკონომიკისა და მდგრადი განვითარების სამინისტროს, შინაგან საქმეთა სამინისტროს, რეგიონული განვითარებისა და ინფრასტრუქტურის სამინისტროს, სსიპ დაავადებათა კონტროლისა და საზოგადოებრივი ჯანმრთელობის ეროვნული ცენტრის, ქ. თბილისის მუნიციპალიტეტების მერიის ასევე, საქართველოს პარლამენტის გარემოს დაცვისა და ბუნებრივი რესურსების კომიტეტის, საქართველოში ევროკავშირის დელეგაციის და სამოქალაქო სექტორის წარმომადგენლები ესწრებოდნენ.