ახალი ამბები
გარემოს დაცვისა და სოფლის მეურნეობის მინისტრმა ოთარ შამუგიამ გარემოსდაცვითი ზედამხედველობის დეპარტამენტისა და ეროვნული სატყეო სააგენტოს რეგიონული სამსახურების ხელმძღვანელებთან სამუშაო შეხვედრა გამართა
შეხვედრაზე, აღნიშნული უწყებების კომპეტენციის ფარგლებში, რეგიონებში არსებული გამოწვევები, საჭიროებები და სამომავლო გეგმები განიხილეს.
„მნიშვნელოვანია, რეგიონული სამსახურების წარმომადგენლებისგან მოვისმინოთ ადგილებზე არსებული ვითარების, მიმდინარე საქმიანობის და არსებული გამოწვევების შესახებ, რათა მოვახდინოთ დროული და ეფექტიანი რეაგირება. მიუხედავად განხორციელებული ცვლილებებისა და პროგრესისა, სამუშაო ბევრი გვაქვს. შესაძლებლობის ფარგლებში, რეგიონულ სამსახურებს სრული მხარდაჭერა აქვთ“, - განაცხადა ოთარ შამუგიამ.
მინისტრმა ისაუბრა ქვეყნისთვის გარემოსდაცვითი ზედამხედველობის დეპარტამენტისა და ეროვნული სატყეო სააგენტოს ფუნქციური მნიშვნელობის შესახებ და ყურადღება უწყებების ტექნიკური და ინსტიტუციური კიდევ მეტად გაძლიერების საჭიროებაზე გაამახვილა.
როგორც შეხვედრაზე აღინიშნა, კონტროლის თანამედროვე მექანიზმების მიმართულებით შესაძლებლობების გაძლიერებისა და ფუნქციების გაზრდის ფონზე, გარემოსდაცვითი ზედამხედველობის დეპარტამენტის და ეროვნული სატყეო სააგენტოს საქმიანობა, კიდევ უფრო ეფექტიანი გახდა, რასაც მოწმობს სტატისტიკა - 2023 წელს, გარემოსდაცვითი ზედამხედველობის დეპარტამენტის თანამშრომლებმა გარემოსდაცვითი კანონმდებლობის 12 700-ზე მეტი ფაქტი, ხოლო ეროვნული სატყეო სააგენტოს სამსახურებმა, ქვეყნის მასშტაბით, ხე-ტყის უკანონო მოპოვებისა და ტრანსპორტირების 1000-ზე მეტი შემთხვევა გამოავლინეს.
ეროვნული სატყეო სააგენტოს უფროსის, კახა ცერცვაძის განცხადებით, ბუნებრივი რესურსებით უკანონო სარგებლობის ფაქტების პრევენცია, გამოვლენა და აღკვეთა 2024 წელსაც სააგენტოს ერთ-ერთ მთავარ პრიორიტეტს წარმოადგენს.
როგორც გარემოსდაცვითი ზედამხედველობის დეპარტამენტის უფროსმა ლევან ჯღარკავამ აღნიშნა, გარემოსდაცვითი მიმართულებით მოთხოვნათა შესრულების ხელშეწყობის და სახელმწიფო კონტროლის ეფექტიანობის ამაღლების მიზნით, დეპარტამენტში მიმდინარე წელსაც მნიშვნელოვანი ღონისძიებები იგეგმება; მათ შორის, სამართალდარღვევათა შემაკავებელი სანქციების დაწესება, რაც დაგეგმილი საკანონმდებლო ცვლილებების საფუძველზე, ბრაკონიერობის, წიაღის უკანონო მოპოვებისა და შავი ზღვის დაბინძურების წინააღმდეგ ბრძოლის საკითხებს დაარეგულირებს.
გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე კახა კაკაბაძე და უწყების შესაბამისი სამსახურების წარმომადგენლები ესწრებოდნენ.
გარემოს დაცვისა და სოფლის მეურნეობის მინისტრი ოთარ შამუგია, უწყებაში შემავალი ყველა რეგიონული სამსახურის ხელმძღვანელთან შეხვედრას ეტაპობრივად გამართავს.