ახალი ამბები
გარემოს დაცვისა და სოფლის მეურნეობის მინისტრი ოთარ შამუგია საქართველოს თევზმომშენებელთა ასოციაციის წარმომადგენლებს შეხვდა
შეხვედრის მონაწილეებმა აკვაკულტურის დარგის პერსპექტივები და არსებული გამოწვევები განიხილეს.
„აკვაკულტურის მდგრადი განვითარების ხელშეწყობა სამინისტროს საქმიანობის ერთ-ერთი პრიორიტეტული მიმართულებაა. საქართველოში აკვაკულტურას განვითარების დიდი პოტენციალი გააჩნია. მოგეხსენებათ, ფერმერებთან პირდაპირ კომუნიკაცია მნიშვნელოვანია გამოწვევების აღმოსაფხვრელად და სწორი გადაწყვეტილებების მისაღებად. ჩვენ გვაქვს საინტერესო გეგმები. მეწარმეებთან ერთად აუცილებლად შევძლებთ მნიშვნელოვანი ნაბიჯების გადადგმას და იმ შესაძლებლობების გამოყენებას, რაც დარგში რეალურად გვაქვს“, - განაცხადა ოთარ შამუგიამ.
შეხვედრაზე საუბარი შეეხო დარგობრივი ცოდნის ამაღლების, ლაბორატორიული შესაძლებლობის გაუმჯობესებისა და დარგის განვითარების ერთიანი ხედვის ჩამოყალიბების მნიშვნელობას.
გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე თენგიზ ნასარიძე და შესაბამისი სამსახურის ხელმძღვანელი პირები ესწრებოდნენ.