ახალი ამბები
ნინო თანდილაშვილმა კლიმატის მწვანე ფონდის საბჭოს შეხვედრაში მიიღო მონაწილეობა
გარემოს დაცვისა და სოფლის მეურნეობის მინისტრის პირველმა მოადგილემ, ნინო თანდილაშვილმა კორეის რესპუბლიკის ქალაქ სონგდოში გამართულ კლიმატის მწვანე ფონდის საბჭოს რიგით 39-ე შეხვედრაში მიიღო მონაწილეობა.
შეხვედრაზე მინისტრის პირველმა მოადგილემ, კლიმატის მწვანე ფონდში მიმდინარე ცვლილებების უკეთ გაცნობისა და პროცესებში ეფექტიანად ჩართვის მიზნით, აღმოსავლეთ ევროპის რეგიონში საბჭოს მიერ რეგიონული დიალოგის ორგანიზების ეფექტიანობის შესახებ ისაუბრა და ყურადღება კლიმატის მწვანე საბჭოს ფინანსურ რესურსებთან ქვეყნების ხელმისაწვდომობის გაზრდის მნიშვნელობაზე გაამახვილა.
„აღმოსავლეთ ევროპის რეგიონი, ფონდიდან ფინანსური რესურსების მოზიდვის კუთხით, კვლავ ვერ ეწევა სხვა რეგიონებს, მიუხედავად იმისა, რომ კლიმატის ცვლილებიდან გამომდინარე, რეგიონი მნიშვნელოვანი გამოწვევების წინაშე დგას. მზარდი ბუნებრივი კატასტროფების ფონზე კი, ეს გამოწვევები მეტად თვალსაჩინო ხდება. ამ ყველაფრის გათვალისწინებით, აუცილებელია კლიმატის მწვანე ფონდის დაფინანსებაზე რეგიონული ხელმისაწვდომობის გაუმჯობესება და პროექტებში, ქვეყნების ეფექტიანი ჩართულობა“,- განაცხადა ნინო თანდილაშვილმა.
შეხვედრაზე ასევე განიხილეს პროგრამების დაფინანსების, ფონდთან პარტნიორობისა და ხელმისაწვდომობის ასევე, ფონდის აკრედიტაციის პროცესის გამარტივების საკითხები.
მნიშვნელოვანია, რომ ნინო თანდილაშვილი კლიმატის მწვანე ფონდის საბჭოში, აღმოსავლეთ ევროპის რეგიონს 2023 წლის იანვრიდან წარმოადგენს. მინისტრის პირველი მოადგილე ასევე საბჭოს აკრედიტაციის კომიტეტის თავმჯდომარეა. უნდა აღინიშნოს, რომ აკრედიტაციის კომიტეტი აქტიურად მუშაობს აკრედიტაციის პროცედურების გამარტივების საკითხებზე. გამარტივებული პროცედურები კი, ფონდიდან მოზიდული სახსრებით კლიმატის ცვლილებასთან ბრძოლის მიმართულებით პროექტების განხორციელებას ემსახურება.
აღსანიშნავია, რომ საბჭომ რიგით 39-ე შეხვედრაზე მსოფლიოს მასშტაბით 1 მილიარდი დოლარის ღირებულების 17 ახალი პროექტი დაამტკიცა, რაც ხელს შეუწყობს კლიმატის ცვლილების შერბილების და ადაპტაციის ღონისძიებების განხორციელებას.