ახალი ამბები
თენგიზ ნასარიძე საერთაშორისო საკონსულტაციო კომპანიის NFB მმართველ დირექტორს ბორა თურანს შეხვდა
ილტოს წყალსაცავის სოციალურ-ეკონომიკური დასაბუთების მომზადებისა და ხორხორის, მთის ძირის, იაკუბლოს, პანტიანისა და ნარეკვავის კაშხლების უსაფრთხოების შეფასების შესახებ შეთანხმების დოკუმენტს ხელი გარემოს დაცვისა და სოფლის მეურნეობის მინისტრის მოადგილე თენგიზ ნასარიძემ და საერთაშორისო საკონსულტაციო კომპანიის NFB მმართველმა დირექტორმა ბორა თურანმა მოაწერეს.
„დამოუკიდებელი საქართველოს ისტორიაში ასეთი მასშტაბის პროექტი პირველად ხორციელდება. ჩვენი ქვეყნის სასოფლო-სამეურნეო მიწის ნაკვეთების სარწყავი წყლით უზრუნველყოფის თვალსაზრისით აღნიშნული პროექტი განსაკუთრებული მნიშვნელობისაა“, - განაცხადა თენგიზ ნასარიძემ.
აღსანიშნავია, რომ საერთაშორისო საკონსულტაციო კომპანიის NFB საქმიანობის ძირითადი სფეროა სოციალურ-ეკონომიკური დასაბუთების, დეტალური პროექტირების, გარემოს დაცვის შეფასების, ჰიდრავლიკური მოდელირების, ადრეული გაფრთხილების სისტემის, წყალდიდობების მართვის გეგმის მომზადება კაშხლების, ჰიდროელექტრო სადგურების, მდინარეთა აუზების, საირიგაციო და სასმელი წყლის სისტემების მიმართულებებით.
კომპანიას დიდი გამოცდილება აქვს კაშხლებზე მუშაობის კუთხით. 12-ზე მეტ მასშტაბურ კაშხალზე კომპანიის მიერ მომზადებულია სხვადასხვა კვლევა, მათ შორის, Kaynarca Dam (თურქეთი) კაშხალი, რომლის სიმაღლეა 116.50 მეტრი, მოცულობა 189,92 კბმ. კაშხალი გამოიყენება ირიგაციის, სასმელი წყლის და ენერგეტიკული დანიშნულებით; Düzbag Dam (თურქეთი) კაშხალი, რომლის სიმაღლეა 169 მეტრი, მოცულობა კი 182.52 კბმ. კაშხალი ასევე გამოიყენება ირიგაციის, სასმელი წყლის და ენერგეტიკული დანიშნულებით.