ახალი ამბები
დავით სონღულაშვილი „არემჯის“ გენერალურ დირექტორს შეხვდა
გარემოს დაცვისა და სოფლის მეურნეობის მინისტრი დავით სონღულაშვილი კომპანიის „არემჯი“ გენერალურ დირექტორს ჯონდო შუბითიძეს შეხვდა. შეხვედრაზე საუბარი შეეხო სასარგებლო წიაღისეულის მარაგების ანგარიშების განხილვის და ლიცენზიებთან დაკავშირებულ საკითხებს. მხარეებმა იმსჯელეს გარემოსდაცვითი პასუხისმგებლობის კანონთან დაკავშირებულ თემებზე.
„ჩვენ აქტიურად ვთანამშრომლობთ კერძო სექტორთან. დიდ კომპანიებს მნიშვნელოვანი წვლილი შეაქვთ ქვეყნის ეკონომიკის განვითარებაში, შესაბამისად, მათი საქმიანობის ხელშეწყობა ძალიან მნიშვნელოვანია, თუმცა ასევე, უნდა გავითვალისწინოთ, რომ ეს ყველაფერი უნდა მოხდეს გარემოზე მინიმალური უარყოფითი ზეგავლენის ხარჯზე. კომპანიებმა ოპერატიულად უნდა შეძლონ გარემოსდაცვითი პასუხისმგებლობის კანონით გათვალისწინებული მოთხოვნების შესრულება“, - განაცხადა დავით სონღულაშვილმა.
კომპანიის „არემჯი“ გენერალურმა დირექტორმა ჯონდო შუბითიძემ სამინისტროს მადლობა გადაუხადა თანამშრომლობისთვის და აღნიშნა, რომ ერთობლივი მუშაობის შედეგად, კომპანიას მნიშვნელოვანი პროგრესი აქვს გარემოსდაცვითი მოთხოვნების შესრულების კუთხით.
შეხვედრას გარემოს დაცვისა და სოფლის მეურნეობის მინისტრის მოადგილე კახა კაკაბაძე, კომპანიის „არემჯი“ დირექტორი გარემოს დაცვის საკითხებში მიხეილ კვარაცხელია და დირექტორის მოადგილე გარემოს დაცვის საკითხებში ალექსანდრე დევიძე ესწრებოდნენ.