ახალი ამბები
ვაშლოვანის დაცულ ტერიტორიებზე ეკოტურისტული ინფრასტრუქტურის განახლება აქტიურად მიმდინარეობს
საქართველოს გარემოს დაცვისა და სოფლის მეურნეობის მინისტრის პირველმა მოადგილე ნინო თანდილაშვილმა, დაცული ტერიტორიების სააგენტოს თავმჯდომარე ბესიკ ამირანაშვილთან ერთად, ვაშლოვანის დაცულ ტერიტორიებზე მიმდინარე ეკოტურისტული ინფრასტრუქტურის მოწყობა-განახლების სამუშაოები დაათვალიერა.
ამ ეტაპზე, ვაშლოვანის დაცულ ტერიტორიებზე ვიზიტორთა ცენტრისა და მის მიმდებარედ არსებული სასტუმროს ტიპის ნომრების რეაბილიტაცია, 17 ბუნგალოს სარემონტო და ტახისწყლის სარეინჯერო კომპლექსის მოწყობის სამუშაოები მიმდინარეობს; შედეგად, მნიშვნელოვნად გაუმჯობესდება ვიზიტორთა მომსახურების ხარისხი და რეინჯერთა სამუშაო პირობები.
აღსანიშნავია, რომ ვაშლოვანის დაცულ ტერიტორიებზე მიმდინარე წელს დასრულდა საინფორმაციო და საინტერპრეტაციო დაფების, მიმართულების და საგზაო მანიშნებლების განახლება.