საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

USAID| G4G –ს საკონფერენციო დარბაზში „წყლის რესურსების მართვის შესახებ“ საქართველოს კანონის პროექტის საჯარო განხილვა გაიმართა.

„წყლის რესურსების მართვის შესახებ“ საქართველოს კანონის ძირითადი მიზანი წყლის რესურსების ინტეგრირებული მართვის პრინციპების შესაბამისად, ადამიანის ჯანმრთელობისთვის უსაფრთხო გარემოს შექმნისთვის სხვადასხვა წყლების დაცვისა და მდგრადი გამოყენებისთვის ძირითადი საკანონმდებლო საფუძვლების ჩამოყალიბებაა.
მნიშვნელოვანია ფაქტი, რომ წყლის რესურსების მართვის სფეროში ცვლილებები 1997 წლიდან არ განხორციელებულა, რეგულირების გარეშე იყო მიწისქვეშა და სანაპირო წყლები. შესაბამისად, ახალი კანონი უზრუნველყოფს წყლის რესურსების სააუზო მართვის თანამედროვე სისტემის ჩამოყალიბებას და როგორც ზედაპირული, ასევე მიწისქვეშა წყლების ხარისხის გაუარესების პრევენციას, წყლის რესურსების ეფექტურ დაცვასა და მათი მდგომარეობის გაუმჯობესებას, ასევე დამაბინძურებელი ნივთიერებების წყლის ობიექტებში მოხვედრის ან/და ჩაშვების თავიდან აცილებას.
ახალი კანონი სარგებლის მომტანი იქნება როგორც სახელმწიფოსა და მოსახლეობისთვის, ისე ბიზნეს სექტორისთვის, რადგან დაცული იქნება ფიზიკური და იურიდიული პირების კანონიერი უფლებები და ინტერესები წყლის რესურსების დაცვისა და გამოყენების სფეროში.
კანონპროექტის საჯარო განხილვას სხვადასხვა სამინისტროების, გარემოს დაცვისა და სოფლის მეურნეობის სამინისტროს სისტემაში შემავალი დარგობრივი უწყებების, საქართველოს პარლამენტის გარემოს დაცვისა და ბუნებრივი რესურსების კომიტეტის, უმაღლესი სასწავლო დაწესებულებების და არასამთავრობო ორგანიზაციების წარმომადგენლები ესწრებოდნენ.
#გარემოსდაცვა2018