ახალი ამბები
თბილისში OIE ევროპის რეგიონული კომისიის 28-ე კონფერენცია იმართება
თბილისში ცხოველთა ჯანდაცვის მსოფლიო ორგანიზაციის (OIE) ევროპის რეგიონული კომისიის 28-ე კონფერენცია მიმდინარეობს. კონფერენცია გარემოს დაცვისა და სოფლის მეურნეობის მინისტრმა, ლევან დავითაშვილმა და ცხოველთა ჯანდაცვის მსოფლიო ორგანიზაციის (OIE) გენერალურმა დირექტორმა, მონიკ ელუამ გახსნეს.
„ჩვენ აქტიურად ვთანამშრომლობთ ცხოველთა მსოფლიო ჯანდაცვის ორგანიზაციასთან, რომელიც წამყვან როლს ასრულებს მსოფლიოში ცხოველთა ჯანმრთელობის დაცვის საკითხებში. უნდა აღინიშნოს, რომ ასეთი წარმომადგენლობითი შეხვედრა საქართველოში პირველად იმართება, რაც კიდევ ერთი აღიარებაა იმ პროგრესის, რომელსაც საქართველომ ბოლო წლებში ვეტერინარული უსაფრთხოების კუთხით მიაღწია. ეს არის უმნიშვნელოვანესი წინაპირობა იმისა, რომ ცხოველური წარმოშობის პროდუქცია ექსპორტზე მრავალ ქვეყანაში გავიდეს“, - განაცხადა ლევან დავითაშვილმა.
კონფერენციას ცხოველთა ჯანდაცვის მსოფლიო ორგანიზაციის (OIE) 53 წევრი და საერთაშორისო ორგანიზაციების 119 წარმომადგენელი ესწრება. კონფერენციის ფარგლებში დელეგატები გლობალიზაციის პირობებში რეგიონსა და მსოფლიოში არსებულ ახალ გამოწვევებზე, ინტეგრირებულ მიდგომებზე, რისკების პრევენციასა და ზედამხედველობის გაძლიერებაზე მსჯელობენ.
კონფერენცია ევროკავშირის მიერ დაფინანსებული, ყოვლისმომცველი ინსტიტუციური განვითარების (CIB) პროგრამის და FAO-ს პროექტის „ცხოველთა იდენტიფიკაციისა და რეგისტრაციის სისტემის ჩამოყალიბება საქართველოში" (NAITS) მხარდაჭერით ტარდება.