დავით სონღულაშვილი: „ ჩვენი მიწა, რომელიც საუკუნეების განმავლობაში ინახავდა ვაზისა და ღვინის კულტურის უნიკალურ ტრადიციას, დღეს უკვე დადასტურებულად შეგვიძლია ვთქვათ, რომ პურის სამშობლოცაა“

გარემოს დაცვისა და სოფლის მეურნეობის მინისტრი დავით სონღულაშვილი, მოადგილესთან ლაშა დოლიძესთან, კულტურის მინისტრთან თინათინ რუხაძესთან და საქართველოს პარლამენტის სოფლის მეურნეობის კომიტეტის თავმჯდომარე გელა სამხარაულთან ერთად, აშშ-ის მეცნიერებათა ეროვნული აკადემიის ჟურნალში (PNAS) გამოქვეყნებული კვლევის  „სამხრეთ კავკასია, საქართველო, ნეოლითის პერიოდში პურის ხორბლის წარმოშობის დამოუკიდებელი ცენტრი“, პრეზენტაციას დაესწრო.


კვლევა ადასტურებს, რომ საქართველო პურის ხორბლის (Triticum aestivum) წარმოშობის დამოუკიდებელი და დღეისათვის დოკუმენტურად დადასტურებული უძველესი კერაა.


„ჩვენი მიწა, რომელიც საუკუნეების განმავლობაში ინახავდა ვაზისა და ღვინის კულტურის უნიკალურ ტრადიციას, დღეს უკვე დადასტურებულად შეგვიძლია ვთქვათ, რომ პურის სამშობლოცაა. ამ აღმოჩენის უმთავრესი ღირებულება მის ზუსტ მეცნიერულ დათარიღებაშია. ეს კვლევა მეცნიერულად ამყარებს იმას, რომ საქართველოში პურისა და ღვინის კულტურა, ერთსა და იმავე პერიოდში იბადებოდა, უწყვეტად ვითარდებოდა და მსოფლიოს მასშტაბით ვრცელდებოდა. ამ საინტერესო პროცესის განვითარებასთან ერთად, დადასტურებულია, რომ მსოფლიოში ცნობილი ხორბლის სახეობებიდან - ხუთი სწორედ საქართველოს ენდემური ჯიშია. ჩვენი ამოცანაა, ეს 8000-წლიანი უწყვეტი მემკვიდრეობა, თანამედროვე, კონკურენტუნარიანი სოფლის მეურნეობის მიმართულებად ვაქციოთ. სამინისტრო, სამეცნიერო-კვლევითი ცენტრი და საქართველოს კულტურის სამინისტრო ბევრს მუშაობს იმისთვის, რომ საქართველოს აგრარული რესურსი კიდევ უფრო დეტალურად იქნას შესწავლილი, მოხდეს ახალი მიმართულებების აღმოჩენა და მსოფლიოსთვის იმის ჩვენება, რომ ეს პატარა ქვეყანა, დიდი აგრარული მემკვიდრეობის ცენტრს წარმოადგენს“,- განაცხადა დავით სონღულაშვილმა.


აღსანიშნავია, რომ სტატია ეყრდნობა აკადემიკოს დავით ლორთქიფანიძის ხელმძღვანელობით ჩატარებულ საერთაშორისო მულტიდისციპლინურ კვლევას, რომელიც ეფუძნება საქართველოში, გადაჭრილ და შულავერის გორებზე აღმოჩენილ 8 000 წლის წინანდელ არქეოლოგიურ მასალასა და პალეობოტანიკოსის, პროფესორ ნანა რუსიშვილის მრავალწლიან სამეცნიერო კვლევებს.


საერთაშორისო მულტიდისციპლინური კვლევა საქართველოს კულტურის სამინისტროს, ღვინის ეროვნული სააგენტოს პროექტის - „ღვინისა და ვაზის კვლევა და პოპულარიზაცია“ - ფარგლებში, ტორონტოს უნივერსიტეტის, ვაისმანის ინსტიტუტისა და „საზოგადოება ივერიისას“ მხარდაჭერით განხორციელდა.