დავით სონღულაშვილი შვეიცარიული კომპანია „Camille Bloch“-ის დამფუძნებელს შეხვდა

გარემოს დაცვისა და სოფლის მეურნეობის მინისტრი დავით სონღულაშვილი შვეიცარიული შოკოლადის მწარმოებელი კომპანიის, „Camille Bloch“ დამფუძნებელს, დანიელ ბლოხს შეხვდა.

შეხვედრის მიზანს საქართველოს საინვესტიციო პოტენციალისა და ქართული თხილის სექტორის განვითარების შესაძლებლობების გაცნობა წარმოადგენდა.

დავით სონღულაშვილმა საქართველოში არსებულ ხელსაყრელ საინვესტიციო გარემოზე ისაუბრა და ყურადღება თავისუფალი ვაჭრობის შესახებ შეთანხმებების საფუძველზე საქართველოსთვის ხელმისაწვდომ მრავალმილიონიან ბაზრებზე წვდომის შესაძლებლობაზე გაამახვილა.
 
მინისტრის განცხადებით, აღნიშნული ფაქტორი საქართველოში ინვესტიციების განხორციელებისა და წარმოების გაფართოებისთვის მნიშვნელოვან უპირატესობას წარმოადგენს. 
დავით სონღულაშვილმა ასევე თხილის სექტორის მნიშვნელობაზე ისაუბრა. მისი განცხადებით, თხილი საქართველოს ერთ-ერთი მნიშვნელოვანი საექსპორტო პროდუქტია, ხოლო მისი წარმოების, ხარისხისა და კონკურენტუნარიანობის ზრდა სახელმწიფოს ერთ-ერთ მნიშვნელოვან მიმართულებას წარმოადგენს. 

დანიელ ბლოხის განცხადებით,  ქართული თხილის ხარისხობრივი განვითარება  მნიშვნელოვანია,  ვინაიდან „Camille Bloch“-ის პროდუქციის წარმოებაში თხილს მნიშვნელოვანი ადგილი უჭირავს.

აღსანიშნავია, რომ კომპანია „Camille Bloch“ 1929 წელს დაარსებული, მესამე თაობის შვეიცარიული საოჯახო ბიზნესია. კომპანიის ერთ-ერთი ცნობილი პროდუქტის, Ragusa-ს, წარმოებაში თხილი 1942 წლიდან გამოიყენება. კომპანია ყოველწლიურად დაახლოებით 600 ტონა თხილს ამუშავებს. 

შეხვედრას „Camille Bloch“-ის წარმომადგენელი რენე მაიერი და ქართულ-შვეიცარიული აგრარული სკოლის დამფუძნებელი მიხეილ სვიმონიშვილი ესწრებოდნენ.