საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

ქ. ზუგდიდში, დადიანების სასახლეში, გარემოს დაცვისა და სოფლის მეურნეობის მინისტრი ლევან დავითაშვილი ფერმერის დღისადმი მიძღვნილ ღონისძიებას დაესწრო. „ფერმერთა დღის აღნიშვნა შემოდგომის დასასრულს სიმბოლურია, რადგან ამ დროს მეურნე საკუთარი შრომის შედეგს აჯამებს“, - აღნიშნა სიტყვით გამოსვლისას მინისტრმა. „ფერმერის დღე 2015 წლიდან აღინიშნება და ფერმერებს სტიმულს აძლევს, რადგან მათი შრომა ფასდება, ისინი ერთმანეთს საკუთარ წარმატებას უზიარებენ, საუკეთესოები კი, ჯილდოვდებიან. ვფიქრობ, ეს ტრადიცია გაგრძელდება მომავალშიც. წელს ეს დღე პირველად აღვნიშნეთ რეგიონში, სამეგრელოში, უკვე ვიცით, რომ მომავალ წელს ამ დღეს ფერმერებს შიდა ქართლში შევხვდებით. სახელმწიფო ქმნის ინსტრუმენტებს იმისათვის, რომ ფერმერმა ნაკლები დანახარჯით, უფრო მერი კონკურენტუნარიანი პროდუქცია შექმნან და მეტი შემოსავალი მიიღონ. მადლობას ვუხდი თითოეულ ფერმერს გაწეული შრომისთვის და შემართებისთვის. მადლობას ვუხდი ფერმერთა ასოციაციას იმისთვის, რომ ასეთ არაჩვეულებრივ ვითარებაში ხდება ამ დღის აღნიშვნა“, - განაცხადა ლევან დავითაშვილმა. ფერმერის დღისადმი მიძღვნილი ღონისძიება საქართველოს ფერმერთა ასოციაციის ორგანიზებით გაიმართა. ღონისძიებაზე, მიღწეული წარმატებისთვის, 23 ფერმერი დაჯილდოვდა. ასოციაციის თავმჯდომარის, ნინო ზამბახიძის თქმით, დადიანების სასახლის ეზოში ამ ღონისძიების ჩატარებას ერთგვარი სიმბოლური დატვირთვა აქვს. „ჩვენ დღეს უკვე არ ვართ გლეხები და ვართ ფერმერები, სწორედ ბიზნესზე ორიენტირებული ადამიანები და წინა საუკუნეები რომ იყოს, სწორედ ეს ფერმერები აღნიშნავდნენ ამ დღეს“, - აღნიშნა ნინო ზამბახიძემ. ფერმერთა დღე 2015 წელს, მაშინდელი სოფლის მეურნეობის მინისტრის, დღეს კი, პარლამენტის აგრარული კომიტეტის თავმჯდომარის, ოთარ დანელიას ინიციატივით დაწესდა. წელს, დადიანების სასახლეში გამართულ ღონისძიებას 400-მდე ფერმერი და მოწვეული სტუმრები, მათ შორის შს მინისტრი გიორგი გახარია, რეგიონული განვითარებისა და ინფრასტრუქტურის მინისტრი მაია ცქიტიშვილი, ეკონომიკის მინისტრი გიორგი ქობალია, სამეგრელო-ზემო სვანეთის გუბერნატორი ალექსანდრე მოწერელია, ასევე, აღმასრულებელი, საკანონმდებლო ორგანოებისა და ადგილობრივი ხელისუფლების წარმომადგენლები დაესწრნენ.