ახალი ამბები
ლევან დავითაშვილმა ბერლინში, გამოფენის ,,მწვანე კვირეული 2019“ ფარგლებში, ორმხრივი შეხვედრები გამართა
სურსათის, სოფლის მეურნეობისა და მებაღეობის საერთაშორისო გამოფენა Gruene Woche 2019 ქ. ბერლინში 18 იანვარს გაიხსნა და 27 იანვარამდე გაგრძელდება. გამოფენის გახსნას საქართველოს გარემოს დაცვისა და სოფლის მეურნეობის მინისტრი ლევან დავითაშვილი დაესწრო.
გამოფენის ფარგლებში, ლევან დავითაშვილმა ორმხრივი შეხვედრები გამართა პოლონეთის რესპუბლიკის სოფლის მეურნეობისა და სოფლის განვითარების მინისტრთან, კრიჟსტოფ არდანოვსკისთან; უკრაინის აგრარული პოლიტიკისა და საკვების მინისტრთან, მაქსიმ მარტინიუკთან; ლატვიის რესპუბლიკის სოფლის მეურნეობის მინისტრთან, ჟანიშ დუკლავსთან;
ლიეტუვას რესპუბლიკის სოფლის მეურნეობის მინისტრთან, გიედრიუს სურფლისთან; ესტონეთის რესპუბლიკის სოფლის საქმეთა მინისტრთან, ტარმო ტამისთან; სომხეთის სოფლის მეურნეობის მინისტრის მოვალეობის შემსრულებელთან, გეღამ გევორგიანთან; ნიდერლანდების სამეფოს სოფლის მეურნეობის, ბუნების და სურსათის ხარისხის მინისტრთან, ვიცე-პრემიერ მინისტრთან, კაროლა შოუტენისთან; თურქეთის რესპუბლიკის სოფლის მეურნეობისა და მეტყევეობის მინისტრთან, ბექირ ფაქდემირლთან და გერმანიის ფედერაციული რესპუბლიკის სურსათისა და სოფლის მეურნეობის მინისტრის მოადგილესთან, ჰერმან ონკო აეიკენსთან. გამართულ შეხვედრებზე, ლევან დავითაშვილმა კოლეგებს გაეროს სურსათისა და სოფლის მეურნეობის ორგანიზაციის გენერალური მდივნის თანამდებობაზე საქართველოს მიერ ნომინირებული კანდიდატი, საქართველოს პრემიერ-მინისტრის მრჩეველი სოფლის მეურნეობის საკითხებში დავით კირვალიძე წარუდგინა. აღნიშნულ პოზიციაზე არჩევნები მიმდინარე წლის ივნისის თვეში გაიმართება. ცალკეულმა ქვეყნებმა ღიად გამოხატეს მხარდაჭერა საქართველოს კანდიდატის მიმართ და მზადყოფნა გამოთქვეს მხარი დაუჭირონ გავლენიანი საერთაშორისო ორგანიზაციის სათავეში მაღალი კომპეტენციის და კვალიფიკაციის მქონე ქართველ კანდიდატს.
გამოფენა ,,მწვანე კვირეული“ (Gruene Woche) გერმანიაში 1926 წლიდან ყოველწლიურად იმართება. წელს გამოფენაში სხვადასხვა ქვეყნის 2000-ზე მეტი კომპანია მონაწილეობს, რომლებიც 100 000-ზე მეტ სხვადასხვა დასახელების სასურსათო პროდუქციას აცნობს დამთვალიერებელს. გამოფენის ვიზიტორთა რაოდენობა ყოველწლიურად მზარდია და 500 000 -ზე მეტს აღწევს. მიმდინარე წელს, გამოფენა ,,მწვანე კვირეულის“ პარტნიორ ქვეყანას, გერმანიასთან ერთად, ფინეთი წარმოადგენს.