ახალი ამბები
ლევან დავითაშვილმა ნიკო კეცხოველის პრემიის სასკოლო გარემოსდაცვითი კონკურსის საფინალო ღონისძიება გახსნა
გარემოს დაცვისა და სოფლის მეურნეობის მინისტრმა ლევან დავითაშვილმა, განათლების, მეცნიერების, კულტურისა და სპორტის მინისტრის მოადგილემ ნათია ზედგინიძემ და გარემოს დაცვისა და ბუნებრივი რესურსების კომიტეტის თავჯდომარემ კახა კუჭავამ ნიკო კეცხოველის პრემიის სასკოლო გარემოსდაცვითი კონკურსის საფინალო ღონისძიება გახსნეს.
სასკოლო პრემიის 2018-19 წლის კონკურსის მთავარი თემა მდგრადი განვითარების მიზნები იყო და მასში ქვეყნის მასშტაბით 500–მდე სკოლა მონაწილეობდა.
„ბედნიერებაა ამდენ საოცრად მოტივირებულ და განათლებულ ახალგაზრდებთან შეხვედრა; ახალგაზრდებთან, რომლებმაც მთელი წლის მანძილზე ძალიან ბევრი იშრომეს საკუთარ თემში მეტად საჭირო და მნიშვნელოვანი ცვლილებების გატარებისთვის, საზოგადოების ცნობიერების ამაღლებისა და მდგრადი განვითარების მიზნების პოპულარიზაციისათვის. თუ დღეს თქვენს ირგვლივ მყოფმა საზოგადოებამ უფრო მეტი იცის მდგრად განვითარებაზე, უფრო მეტად უფრთხილდება გარემოს, ყურადღებას ამახვილებს სოციალურ საკითხებზე, სწორედ, ამ ახალგაზრდების დამსახურებაა. დარწმუნებული ვარ, ვერც ერთი ჯილდო და სტატუსი ვერ შეედრება იმის გააზრებით მიღებულ სიამოვნებას, რომ რამდენი სასიკეთო საქმის გაკეთება შესძელით საკუთარი თემისთვის და საკუთარი ქვეყნისთვის, რადგან ქვეყანაზე ზრუნვა სწორედ, საკუთარ სოფელსა და თემზე ზრუნვით იწყება“, - განაცხადა ლევან დავითაშვილმა.
ღონისძიებაზე გარემოს დაცვისა და სოფლის მეურნეობის სამინისტროს მიერ გამოვლენილი რჩეული პედაგოგიც დააჯილდოვეს. ლევან დავითაშვილმა ხარაგაულის მუნიციპალიტეტის სოფელ ბაზალეთის სკოლის პედაგოგს, თეა ტალახაძეს „მწვანე ჯილდო 2019“ გადასცა.
საერთაშორისო და სამეცნიერო ორგანიზაციების წარმომადგენლებისგან დაკომპლექტებულმა ჟიურიმ საქართველოს 32 სკოლის გუნდიდან სამი გამარჯვებული გამოავლინა : I ადგილი - სოფელ როკითის სკოლა (იმერეთი); II ადგილი - წმინდა ალექსი შუშანიას სახელობის მართლმადიდებლური სკოლა–გიმნაზია (სამეგრელო); III ადგილი - "ქართული სასწავლებელი" (თბილისი).
ეროვნული სატყეო სააგენტოს ინიციატივით, პრიზიორი სკოლებისთვის ბორჯომის ხეობაში შემეცნებითი ექსკურსია გაიმართება. პირველი ადგილის მფლობელ სოფელ როკითის სკოლას, ეროვნული სატყეო სააგენტოს უფროსის მოადგილემ ნათია იორდანიშვლმა სიმბოლური საჩუქარი - ხუთტომეული „დედამიწა“ გადასცა, ასევე გამოვლინდა სატყეო სააგენტოს რჩეული თელავის N 2 საჯარო სკოლა, რომელსაც საჩუქრად ცხოველთა ენციკლოპედია გადაეცა.
სამი გამარჯვებული სკოლის გუნდის თითოეული წევრი ათდღიან „მწვანე ბანაკში“ მიიღებს მონაწილეობას, რომელიც საქართველოს დაცულ ტერიტორიებზე ,,ნორჩი რეინჯერის“ ხუთდღიანი შემეცნებითი პროგრამით დასრულდება. ასევე, სოფელ როკითის სკოლის ლიდერი ნანა ლაბაძე, ერთ სამუშაო დღეს გარემოს დაცვისა და სოფლის მეურნეობის მინისტრთან ერთად იმუშავებს. გარემოსდაცვითი ინფორმაციისა და განათლების ცენტრის “რჩეული სკოლა” მცხეთა-მთიანეთის მუნიციპალიტეტის სოფელ გალავნის საჯარო სკოლა გახდა. განათლების ცენტრი სკოლის ბიბლიოთეკის სივრცეში მწვანე ბიბლიოთეკას მოაწყობს.
მასშტაბური სასკოლო გარემოსდაცვითი კონკურსი „ნიკო კეცხოველის სასკოლო პრემია“ 2015 წლიდან ტარდება CENN-ის მიერ, ავსტრიის თანამშრომლობა განვითარებისათვის ფინანსური მხარდაჭერით. კონკურსის თანაორგანიზატორები არიან გარემოს დაცვისა და სოფლის მეურნეობის სამინისტრო, განათლების, მეცნიერების, კულტურისა და სპორტის სამინისტრო და საქართველოს პარლამენტი.