ახალი ამბები
ENI SEIS II East ფარგლებში შეხვედრა გაიმართა
საქართველოს გარემოს დაცვისა და სოფლის მეურნეობის სამინისტროში, ევროკავშირის პროექტის „ერთიანი გარემოსდაცვითი საინფორმაციო სისტემების პრინციპებისა და პრაქტიკის დანერგვა“ – ENI SEIS II East ფარგლებში, შეხვედრა „ღია მონაცემები და ელექტრონული მმართველობა გარემოს დაცვისათვის" გაიმართა.
გარემოსდაცვითი ინფორმაციის გაზიარებისა და გავრცელების გაუმჯობესების მიზნით, ღონისძიების მონაწილეებმა შეხვედრაზე ეროვნული საგზაო რუკის საბოლოო ვერსია განიხილეს.
როგორც აღინიშნა, გარემოსდაცვითი ინფორმაციის გაზიარებისა და ეფექტიანი გავრცელებისთვის მნიშვნელოვანია მართვის მოდელის შემუშავება, რაც სამართლებრივი და სალიცენზიო ჩარჩოს, ინფორმაციის გაზიარების შესაბამისი სტანდარტის დანერგვით და საერთაშორისო პარტნიორებთან თანამშრომლობის საფუძველზე, ცნობიერების ამაღლებაზე ზრუნვით მიიღწევა.
შეხვედრაზე სამართლებრივი, ინსტიტუციური და ტექნიკური საკითხების უზრუნველსაყოფად კონკრეტული ნაბიჯები განისაზღვრა.
აღსანიშნავია, რომ პროექტი ევროპის გარემოს სააგენტოს (EEA) მიერ, PwC-ის მხარდაჭერით ხორციელდება.
შეხვედრას ევროკავშირის წარმომადგენლობის ატაშე საქართველოში ალექსანდრე დარასი, სამინისტროს და შესაბამისი სამთავრობო და არასამთავრობო სექტორის წარმომადგენლები ესწრებოდნენ.