მევენახეობის სასოფლო-სამეურნეო კოოპერატივების მხარდაჭერის სახელმწიფო პროგრამა

პროგრამის განმახორციელებელია საქართველოს სოფლის მეურნეობის სამინისტროს სისტემაში შემავალი სსიპ - სასოფლო-სამეურნეო კოოპერატივების განვითარების სააგენტო

კაპიტალური ინვესტირების ფარგლებში სასოფლო - სამეურნეო კოოპერატივებს გრანტის სახით გადაეცემათ 100 ტონა ყურძნის გადამუშავებისათვის საჭირო აღჭურვილობა მოცემული დანართის  შესაბამისად.

• პროგრამის ფარგლებში სულ გაიცემა არანაკლებ 3 ერთეული საწარმოსათვის საჭირო აღჭურვილობა.
• კაპიტალური ინვესტირება არ მოიცავს იმ შენობა-ნაგებობის აშენება-მოწყობის/რეკონსტრუქციის სამუშაოებს, რომელშიც განთავსდება შესაბამისი აღჭურვილობა. შენობა-ნაგებობის აშენება ან/და მოწყობა/რეკონსტრუქცია წარმოადგენს პროგრამის მონაწილის ვალდებულებას, რომელიც უნდა შესრულდეს პროგრამაში მონაწილეობის  შემთხვევაში, მონაწილესთან გაფორმებული წინარე ხელშეკრულებით გათვალისწინებული პირობების შესაბამისად.

ტექნიკური დახმარება

მონაწილე პროგრამის ფარგლებში  მიიღებს ტექნიკურ დახმარებას, რაც გულისხმობს მოკლევადიან სწავლებას და კონსულტაციებს შემდეგი მიმართულებებით: ვენახის მოვლა, ღვინის წარმოება, სასოფლო-სამეურნეო კოოპერატივის შედა საწარმოო ურთიერთობები და სამართლებრივი რეგულაციები.

პროგრამაში მონაწილეობის მისაღებად დადგენილი პირობები:

პროგრამაში მონაწილეობის მიღების უფლება აქვთ იმ სასოფლო-სამეურნეო კოოპერატივებს, რომლებიც პროგრამაში მონაწილეობის განაცხადის  წარდგენისას აკმაყოფილებენ შემდეგ პირობებს:

• „სასოფლო-სამეურნეო კოოპერატივის შესახებ“ საქართველოს კანონის შესაბამისად მინიჭებული აქვს სასოფლო-სამეურნეო კოოპერატივის სტატუსი; 
• განაცხადის წარდგენისას სააგენტოსაგან არაქვს მიღებული რეკომენდაცია საქმიანობაში ხარვეზის გამოსწორების შესახებ. გარდა იმ შემთხვევისა, თუ კოოპერატივს მსგავსი რეკომენდაცია მიღებული აქვს და  განაცხადის წარდგენამდე წარმოადგენს  ხარვეზის აღმოფხვრის შესახებ  შესაბამის მტკიცებულებას;
• სასოფლო-სამეურნეო კოოპერატივი წევრთა რაოდენობა შეადგენს არანაკლებ 20 მეპაიეს და სასოფლო-სამეურნეო კოოპერატივს ან/და მის მეპაიეებს საკუთრებაში გააჩნიათ არანაკლებ 20 ჰექტარი ვენახი;
• სასოფლო-სამეურნეო კოოპერატივის მეპაიეებს ინდივიდუალურად (თითოეულს) საკუთრებაში გააჩნია ან/და საპაიო შენატანის სახით კოოპერატივში შეტანილი აქვს არანაკლებ 0.3 ჰექტარივენახი;
• იმ შემთხვევაში თუ სასოფლო-სამეურნეო კოოპერატივი რეგისტრირებულია „მაღალმთიანი რეგიონების განვითარების შესახებ“ საქართველოს კანონით განსაზღვრულ მაღალმთიან დასახლებაში, სასოფლო-სამეურნეო კოოპერატივის მეპაიეებს ინდივიდუალურად (თითოეულს) საკუთრებაში გააჩნია ან/და საპაიო შენატანის სახითკოოპერატივში შეტანილი აქვს არანაკლებ 0.1 ჰექტარი ვენახი.
• არ გააჩნია საგადასახადო დავალიანება;
• საკუთრებაში გააჩნია ღვინის საწარმოსათვის განკუთვნილი შენობა-ნაგებობა ან მიწის ნაკვეთი;
• კოოპერატივის ან/და მისი მეპაიის საკუთრებაში არსებულ ვენახებში გაშენებულია ვაზის შემდეგი ჯიშები: რქაწითელი, საფერავი, მწვანე, ხიხვი, ქისი, ჩინური, ცოლიკაური, ციცქა, კრახუნა, ალექსანდროული, ოჯალეში, ჩხავერი, ალადასტური, უსახელოური, მუჯურეთული, წულუკიძის/რაჭულითეთრა, რაც დასტურდება სსიპ სოფლის მეურნეობის სამეცნიერო კვლევითი ცენტრის მიერ;
• კოოპერტივს მობილიზებული აქვს ამ პროგრამის ფარგლებში ასაშენებელი/სარეკონსტრუქციო შენობისათვის განკუთვნილი ფულადი სახსრები, რაც დასტურდება საქართველოს კანონმდებლობით გათვალისწინებული წესით დამოწმებული საერთო კრების გადაწყვეტილებით;
•  სოფლის მეურნეობის სამინისტროს ტერიტორიული ორგანოს  მიერ დასტურდება, რომ კოოპერატივის ან/და მისი მეპაიეების საკუთრებაში არსებულ ვენახებში გაშენებულია ვაზის ნარგაობა.

პროგრამაში მონაწილეობაზე ელექტრონული განაცხადის წარდგენა

პროგრამაში რეგისტრაცია შესაძლებელია ელექტრონულად, სააგენტოს ოფიციალური ვებ-გვერდის მეშვეობით (www.acda.gov.ge). 

• რეგისტრაციის დროს კოოპერატივის  მიერ შესაბამისი მონაცემების არასწორად წარდგენის შემთხვევაში, ეგზავნება შეტყობინება ხარვეზის არსებობასთან დაკავშირებით, რომლის გამოსასწორებლად განესაზღვრება არაუმეტეს 10 (ათი) სამუშაო დღე. შეტყობინების გაგზავნა ხდება პრეტენდენტის ოფიციალური ელექტრონული ფოსტის მისამართზე და ძალაში შედის გაგზავნისთანავე.
• ხარვეზის არასათანადოდ აღმოფხვრის შემთხვევაში, სააგენტო კოოპერატივს დამატებით უგზავნის შეტყობინებას ხარვეზის თაობაზე და განუსაზღვრავს 5 სამუშაო დღეს ხარვეზის აღმოსაფხვრელად. 
  
• ხარვეზის აღმოსაფხვრელად დოკუმენტების სააგენტოსათვის წარდგენა შესაძლებელია როგორც მატერიალურად, ისე სააგენტოს  ოფიციალური ელ. ფოსტის მეშვეობით (info@acda.gov.ge).
• წარმოდგენილი განაცხადების განხილვის შემდეგ კოოპერატივს ეგზავნება დადასტურება პროგრამის მოთხოვნების დაკმაყოფილების თაობაზე.

პრეტენდენტმა რეგისტრაციისას სააგენტოს უნდა წარუდგინოს შემდეგი დოკუმენტები :

• ხარვეზის აღმოფხვრის დამადასტურებელი დოკუმენტი (არსებობის შემთხვევაში);
• წევრთა რეესტრის ასლი;
• ამონაწერი სსიპ საჯარო რეესტრის ეროვნული სააგენტოდან პრეტენდენტის და მეპაიეების საკუთრებაში მიწის ნაკვეთის  არსებობის თაობაზე;
• ცნობა სსიპ შემოსავლების სამსახურის ელექტრონული პორტალიდან დავალიანების არ ქონის თაობაზე;
• ამონაწერი სსიპ საჯარო რეესტრის ეროვნული სააგენტოდან პრეტენდენტის საკუთრებაში არსებული ღვინის საწარმოსათვის განკუთვნილი შენობა-ნაგებობის ან მიწის ნაკვეთის არსებობის თაობაზე;
• სსიპ სოფლის მეურნეობის სამეცნიერო კვლევითი ცენტრის მიერ გაცემული ცნობა პრეტენდენტის ან/და მისი მეპაიის საკუთრებაში არსებულ ვენახებში ამ პროგრამით დადგენილ ფართობებზე გაშენებული ვაზის ჯიშების თაობაზე;
• ნოტარიულად დამოწმებული საერთო კრების ოქმი პრეტენდენტის საპაიო ფონდში პროგრამის ფარგლებში გათვალისწინებული სამშენებლო/სარეკონსტრუქციო სამუშაოებისათვის განკუთვნილი თანხის მობილიზების თაობაზე;
• სოფლის მეურნეობის სამინისტროს ტერიტორიული ორგანოს  მიერ გაცემული ცნობა პრეტენდენტის და მისი მეპაიეების საკუთრებაში არსებულ ვენახებში ვაზის ნარგაობის არსებობის თაობაზე.

პროგრამით გათვალისწინებული მხარდაჭერის მიღების პირობები

 იმ შემთხვევაში, თუ დაკმაყოფილდა კოოპერატივის განაცხადი, მონაწილესა და სააგენტოს შორის ამ პროგრამის შესაბამისად, ფორმდება წინარე ხელშეკრულება, რომელიც ერთის მხრივ ითვალისწინებს პროგრამის ფარგლებში მონაწილის ვალდებულებას კაპიტალური ინვესტირებისა და ტექნიკური მხარდაჭერის მიღებამდე, წინარე ხელშეკრულების გაფორმებიდან არაუმეტეს 3 თვის ვადაში მოაწყოს ყურძნის პირველადი გადამუშავებისათვის განკუთვნილი საწარმოს შენობა-ნაგებობა, რომლის საერთო ფართი არ უნდა იყოს 300მ2-ზე ნაკლები. ხოლო, მეორეს მხრივ სააგენტოს ვალდებულებას უზრუნველყოს მონაწილის მიერ მოთხოვნილი საწარმოსათვის განკუთვნილი აღჭურვილობის შესყიდვა.

• წინარე ხელშეკრულების გაფორმებამდე კოოპერატივმა სააგენტოს უნდა წარუდგინოს ამონაწერი ფინანსური ინსტიტუტიდან მის ანგარიშზე არანაკლებ 50 000 ლარის არსებობის შესახებ.
• მონაწილესა და სააგენტოს შორის, პროგრამით განსაზღვრული წინარე ხელშეკრულება გაფორმდება მონაწილეთა რიგითობის მიხედვით. ამ პროგრამის ფარგლებში გადასაცემი აღჭურვილობის ოდენობის შესაბამისად.

შენობა-ნაგებობა, რომელშიც უნდა განთავსდეს ამ პროგრამით გათვალისწინებული აღჭურვილობა უნდა აკმაყოფილებდეს შემდეგ მოთხოვნებს:

• შესაბამისობაში უნდა იყოს გამართული საწარმოო პროცესისთვის საჭირო მოთხოვნებთან, უზრუნველყოფილი უნდა იყოს აღჭურვილობის გამართულად განთავსებისათვის/ფუნქციონირებისთვის საჭირო აუცილებელი  მინიმალური ფართით. აღნიშნული შესაბამისობის დადგენა ხდება სსიპ „საქართველოს სოფლის-მეურნეობის სამეცნიერო კვლევითი ცენტრის“ მიერ გაცემული დასკვნის საფუძველზე;
• შენობა-ნაგებობას უნდა გააჩნდეს წყალგაყვანილობის, შესაბამისი სიმძლავრის ელექტრო ენერგიის წყარო და საკანალიზაციო სისტემა;
• სსიპ სურსათის ეროვნული სააგენტოს მიერ გაცემული ცნობის შესაბამისად უნდა აკმაყოფილებდეს საქართველოს მთავრობის მიერ დამტკიცებულ სურსათის  ჰიგიენის ზოგად წესს.

პროგრამით გათვალისწინებული ვალდებულებების შესრულების შემთხვევაში მონაწილესა და სააგენტოს შორის ფორმდება კაპიტალური ინვესტირების ხელშეკრულება.

პროგრამის მონაწილე ვალდებულია პროგრამაში მონაწილეობის შესახებ ხელშეკრულების გაფორმებიდან 5 (ხუთი) წლის განმავლობაში:

• არ დაუშვას ამ პროგრამაში ჩართული იმ მიწის ნაკვეთის გასხვისება, რომელზეც განთავსებულია ვენახები, შენობა-ნაგებობა და აღჭურვილობა, გარდა სააგენტოს წინასწარი ნებართვით სხვა სასოფლო-სამეურნეო კოოპერატივზე ამ პროგრამით გათვალისწინებული პირობებით გასხვისებისა;
•  არ დაუშვას ამ პროგრამის ფარგლებში მიღებული აღჭურვილობის გასხვისება;
• უზრუნველყოს საწარმოში  უსაფრთხოების აუცილებელი ნორმების დაცვა;
• არ დაუშვას  ამ პროგრამით დადგენილი ვენახის ფართობები და მეპაიეთა რაოდენობის შემცირება;
•  შეინარჩუნოს სასოფლო-სამეურნეო კოოპერატივის სტატუსი;
•  აწარმოოს ყურძნის მიღების აღრიცხვის დოკუმენტაცია;
• წარმოუდგინოს სააგენტოს კვარტალური ანგარიში გაწეული საქმიანობის შესახებ ყოველი კვარტლის მომდევნო თვის არაუგვიანეს 15 რიცხვისა და წლიური ანგარიში ყოველი მომდევნო წლის არაუგვიანეს 15 თებერვლისა;
• უზრუნველყოს ყოველწლიურად არანაკლებ 100 ტონა ყურძნის მიღება და გადამუშავება, გარდა იმ შემთხვევისა, თუ აღნიშნული შეუძლებელია ფორსმაჟორული მდგომარეობის გამო;
  

 იმ შემთხვევაში, თუ პროგრამის ფარგლებში გაფორმებული კაპიტალური ინვესტირების შესახებ ხელშეკრულებიდან 5 (ხუთი) წლის განმავლობაში პროგრამის მონაწილეს სურს საწარმოს ადგილის შეცვლა, ამის შესახებ მან წინასწარ წერილობით უნდა აცნობოს სააგენტოს. სააგენტოს ნებართვის შემთხვევაში, საწარმოს მოწყობა პროგრამით გათვალისწინებული ყველა მოთხოვნის დაცვით, არ ჩაითვლება პროგრამაში მონაწილეობის პირობის დარღვევად.

კაპიტალური ინვესტირების მიღების შემდგომ მონაწილის მიერ ნაკისრი ვალდებულებების შეუსრულებლობის სამართლებრივი შედეგები

• პროგრამის მონაწილის მიერ, კაპიტალური ინვესტირების ხელშეკრულებით ნაკისრი ვალდებულებების ნაწილობრივ ან/და სრულად შეუსრულებლობის შემთხვევაში, რაც დასტურდება სააგენტოს თავმჯდომარის მიერ განსაზღვრული უფლებამოსილი პირის შესაბამისი დასკვნით, სასოფლო-სამეურნეო კოოპერატივს განესაზღვრება შესაბამისი ვალდებულების შესრულებისათვის დამატებითი ვადა, მაგრამ არაუმეტეს 3 თვისა. პროგრამის მონაწილე ვალდებულია, აღნიშნულ ვადაში უზრუნველყოს დაფიქსირებული ხარვეზის აღმოფხვრა
• დაწესებული ვადის უშედეგოდ გასვლის შემთხვევაში პროგრამის მონაწილესთან დადებული ხელშეკრულება წყდება
• პროგრამაში მონაწილეობის შესახებხელშეკრულების შეწყვეტისას მონაწილე ვალდებულია  ხელშეკრულების შეწყვეტიდან 3 (სამი) თვის ვადაში უზრუნველყოს კაპიტალური ინვესტირების ღირებულების სახელმწიფო ბიუჯეტში სრულად გადახდა.

მონიტორინგი

• კოოპერატივის მიერ განაცხადით წარმოდგენილი მოთხოვნების შესაბამისობისა და მონაწილესთან გაფორმებული ხელშეკრულებით გათვალისწინებული პირობების შესრულების საველე ან/და დოკუმენტურ მონიტორინგს ახორციელებს სააგენტოს უფლებამოსილი პირ(ებ)ი.
• საველე და დოკუმენტურ მონიტორინგს ექვემდებარება პრეტენდენტი და მონაწილე პროგრამის განხორციელების ნებისმიერ ეტაპზე.
• მონაწილე პროგრამის ფარგლებში მონიტორინგს ექვემდებარება კაპიტალური ინვესტირების ხელშეკრულების გაფორმებიდან 5 (ხუთი) წლის განმავლობაში.