განცხადებები
განცხადება საქართველოში ავტომობილის ემისიის Euro 5b სტანდარტის შემოღებასთან დაკავშირებით
საქართველოში ავტომობილის პირველადი ან დროებითი რეგისტრაცია შესაძლებელია მხოლოდ იმ შემთხვევაში, თუ იგი აკმაყოფილებს მინიმუმ Euro 5b სტანდარტს. შესაბამისი რეგულაცია (საქართველოს მთავრობის დადგენილება N238; 28.06.2023; იხ. დანართი) ძალაში შევიდა 2024 წლის 1 იანვრიდან მსუბუქი ავტომობილებისა (M1) და მიკროავტობუსებისთვის (M2), ხოლო 2025 წლის 1 იანვრიდან იგი ძალაში შევა სატვირთო ავტომობილებისა (N1, N2, N3) და ავტობუსებისთვის (M3).
ცხრილში მოცემული საზღვარგარეთის ქვეყნებიდან საქართველოში იმპორტირებული (გარდა 1 წლამდე) ან/და აღნიშნულ ქვეყნებში რეგისტრირებული და შესაბამის წელს გამოშვებული ავტომობილები გაივლიან საქართველოში რეგისტრაციას ისევე, როგორც გადიოდნენ 2024 წლის 1 იანვრამდე.
| ქვეყანა | ავტომობილის გამოშვების წელი |
|---|---|
| ევროკავშირის წევრი ქვეყნები | ≥2013 |
| დიდი ბრიტანეთისა და ჩრდილოეთ ირლანდიის გაერთიანებული სამეფო | ≥2013 |
| შვეიცარიის კონფედერაცია | ≥2013 |
| ნორვეგიის სამეფო | ≥2013 |
| ამერიკის შეერთებული შტატები | ≥2013 |
| იაპონია | ≥2013 |
| კორეის რესპუბლიკა | ≥2013 |
| თურქეთის რესპუბლიკა | ≥2013 |
| კანადა | ≥2013 |
| ჩილეს რესპუბლიკა | ≥2013 |
| ავსტრალიის თანამეგობრობა | ≥2016 |
| რუსეთის ფედერაცია (2022 წლამდე რეგისტრირებული) | ≥2016 - ≤2021 |
| სინგაპურის რესპუბლიკა | ≥2017 |
| არაბთა გაერთიანებული საამიროები (მხოლოდ N3 კატეგორიის ავტომობილები) | ≥2021 |
| ისრაელი | ≥2013 |
| ჩინეთის სახალხო რესპუბლიკა | ≥2018 |
სხვა ავტომობილების რეგისტრაციისთვის საჭიროა საქართველოს გარემოს დაცვისა და სოფლის მეურნეობის სამინისტროს მიერ გაცემული დასკვნა, რომლითაც დასტურდება ავტომობილის გაფრქვევების (გამონაბოლქვის) ზღვრული ნორმების ამ რეგლამენტის მოთხოვნებთან შესაბამისობა. კერძოდ, აღნიშნული დასკვნა საჭიროა:
1.ცხრილში მოცემული ქვეყნებიდან იმპორტირებული ან/და აღნიშნულ ქვეყნებში წარმოებული არარეგისტრირებული ერთ წლამდე ასაკის ავტომობილებისთვის;
2 .ცხრილში მოცემულ ქვეყნებში სათანადო წელს წარმოებული ერთ წელზე მეტი ასაკის ავტომობილებისთვის, რომლის იმპორტი ხორციელდება სხვა ქვეყნიდან;
3.ცხრილში მოცემული ქვეყნებიდან იმპორტირებული მითითებულ წელზე უფრო ადრე გამოშვებული ავტომობილებისთვის. რუსეთის ფედერაციიდან იმპორტირებული ავტომობილის შემთხვევაში დასკვნა საჭიროა 2016 წლამდე და 2021 წლის შემდეგ გამოშვებული ავტომობილებისთვის, ასევე 2016-2021 წლებში გამოშვებული რუსეთში არარეგისტრირებული ავტომობილებისთვის;
4.ცხრილში მოცემული ქვეყნების გარდა ნებისმიერი სხვა ქვეყნიდან (მაგალითად: ინდოეთი, არაბთა გაერთიანებული საემიროები, სომხეთი, აზერბაიჯანი, უკრაინა, უზბეკეთი, ირანი და ა.შ.) იმპორტირებული ავტომობილისთვის (მიუხედავად ასაკისა).
საქართველოს გარემოს დაცვისა და სოფლის მეურნეობის სამინისტროს დასკვნის მისაღებად საჭიროა სამინისტროს წარედგინოს Euro 5b-ს, ან უფრო მაღალი სტანდარტის დამადასტურებელი შემდეგი სახის დოკუმენტაცია:
1. ცხრილში მოცემული ქვეყნებიდან იმპორტირებული ან/და აღნიშნულ ქვეყნებში წარმოებული არარეგისტრირებული ერთ წლამდე ასაკის ავტომობილებისთვის:
- ან/და ევროპისთვის გაეროს ეკონომიკური კომისიის (UNECE) მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების მიერ გაცემული შესაბამისი დოკუმენტი. მსგავსი დოკუმენტი შესაძლოა წარმოადგენდეს ავტომობილის ტიპის აღიარების დოკუმენტს ან/და ტესტირების ცენტრის დასკვნას (Vehicle Type Approval Document ან Vehicle Test Report). აღნიშნულ დოკუმენტთან დაკავშირებით დაინტერესებულ პირს შეუძლია მიმართოს შესაბამის სახელმწიფო ორგანოს, ავტომობილის მწარმოებელს, დილერს ან თავად ჩაუტაროს ტესტირება ტექნიკური მომსახურების ცენტრში. UNECE-ის მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების ჩამონათვალი მოცემულია ბმულზე: https://apps.unece.org/WP29_application/List_TA_TS. საქართველოში მსგავსი ტესტირება არ ტარდება.
- ან/და ავტომობილის მწარმოებლის მიერ გაცემული შესაბამისობის სერთიფიკატი (CoC - Certificate of Conformity). შესაბამისობის სერთიფიკატზე დაინტერესებულ პირებს მწარმოებლის გარდა ასევე შეუძლიათ მიმართონ შუალედურ კომპანიებს, რომლებიც სთავაზობენ მომსახურებას ონლაინ, თავად უკავშირდებიან მწარმოებლებს და შეუძლიათ შესაბამისობის სერთიფიკატის (CoC) ასლის მოწოდება. შესაბამისობის სერთიფიკატი გაცემული უნდა იყოს მწარმოებლის და არა მისი ოფიციალური წარმომადგენლობის, დილერის ან სხვა პირის/ორგანიზაციის მიერ.
- ან/და ავტომობილის მწარმოებლის მიერ გაცემული დოკუმენტი (მისაღებია წერილიც), რომელიც გაცემული უნდა იყოს მწარმოებლის და არა მისი ოფიციალური წარმომადგენლობის, დილერის ან სხვა პირის/ორგანიზაციის მიერ.
ყველა ამ დოკუმენტში მოცემული უნდა იყოს შესაბამისი ავტომობილის მარკა, ძრავის ნომერი, ძრავის მოცულობა, ამასთანავე, გამონაბოლქვის მონაცემები ან/და გაფრქვევის ეროვნული ზღვრული ნორმების ტოლფასი ან უფრო მაღალი სტანდარტი.
- აშშ-ში ან აშშ-ს ბაზრისთვის წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს შეუძლია წარადგინოს აშშ-ს გარემოს დაცვის სააგენტოს მიერ გაცემული შესაბამისობის სერთიფიკატი (EPA Certificate of Conformity), სერთიფიკატის შემაჯამებელი ინფორმაცია (Certificate Summary Information), შესაბამის ავტომობილზე განთავსებული ავტომობილის გაფრქვევების შესახებ ეტიკეტის (Vehicle Emission Control Information – VECI) ფოტოასლი და საიდენტიფიკაციო ნომრ(ებ)ის (VIN) ეტიკეტის ფოტოასლი. ამერიკული შესაბამისობის სერთიფიკატის და სერთიფიკატის შემაჯამებელი ინფორმაციის მოძიების შესახებ ინფორმაცია მოცემულია ბმულზე: https://www.epa.gov/importing-vehicles-and-engines/how-obtain-copy-certificate-conformity-light-duty-vehicle-car-truck. VECI-ის და VIN კოდის ეტიკეტები ძირითადად განთავსებულია ავტომობილის კაპოტქვეშ, თუმცა ისინი სხვა ადგილასაც შეიძლება იყოს განთავსებული.
2. ცხრილში მოცემულ ქვეყნებში სათანადო წელს წარმოებული ერთ წელზე მეტი ასაკის ავტომობილებისთვის, რომლის იმპორტი ხორციელდება სხვა ქვეყნიდან, ზემოთ, 1-ში ჩამოთვლილი საბუთების გარდა, ასევე შესაძლებელია:
- შესაბამისი ავტომობილის მწარმოებლის საქართველოში ოფიციალური წარმომადგენლის/დილერის მიერ გაცემული დოკუმენტის წარმოდგენა, რომელშიც ასახული უნდა იყოს შესაბამისი ავტომობილ(ებ)ის გამონაბოლქვის მონაცემები ან/და გამონაბოლქვის ზღვრული ნორმების ტოლფასი ან უფრო მაღალი სტანდარტი. მწარმოებლის უცხოური წარმომადგენლის/დილერის მიერ გაცემული დოკუმენტი არ მიიღება.
3-4. ცხრილში მოცემული ქვეყნებიდან იმპორტირებული მითითებულ წელზე უფრო ადრე/გვიან გამოშვებული ავტომობილებისთვის და ცხრილში მოცემული ქვეყნების გარდა ნებისმიერი სხვა ქვეყნიდან (მაგალითად: ინდოეთი, არაბთა გაერთიანებული საემიროები, სომხეთი, აზერბაიჯანი, უკრაინა, უზბეკეთი, ირანი და ა.შ.) იმპორტირებული ავტომობილისთვის (მიუხედავად ასაკისა):
- მწარმოებლის მიერ გაცემული ავტომობილის შესაბამისობის სერტიფიკატი (CoC - Certificate of Conformity) და ავტომობილის ტიპის დამტკიცების დოკუმენტი (Vehicle Type Approval Document).
- ან/და ევროპისთვის გაეროს ეკონომიკური კომისიის (UNECE) მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების მიერ გაცემული შესაბამისი დოკუმენტი, რომელშიც ასახული უნდა იყოს შესაბამისი მოდელის ავტომობილის გამონაბოლქვის მონაცემები.
- აშშ-ში ან აშშ-ს ბაზრისთვის წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს შეუძლია წარადგინოს აშშ-ს გარემოს დაცვის სააგენტოს მიერ გაცემული შესაბამისობის სერთიფიკატი, სერთიფიკატის შემაჯამებელი ინფორმაცია, შესაბამის ავტომობილზე განთავსებულიავტომობილის გაფრქვევების შესახებ ეტიკეტის ფოტოასლი და საიდენტიფიკაციო ნომრ(ებ)ის ეტიკეტის ფოტოასლი. ზემოაღნიშნულ დოკუმენტებში ასახული უნდა იყოს შესაბამისი ავტომობილის გამონაბოლქვის მონაცემები იმგვარად, რომ იგი შედარებადი იყოს საქართველოს კანონმდებლობაში მოცემულ ნორმებთან.
სამინისტროში წარდგენილ განცხადებას თან უნდა ახლდეს წარდგენილი დოკუმენტ(ებ)ის შესაბამისი ავტომობილ(ებ)ის მარკა, მოდელი, ძრავის ნომერი, ძრავის მოცულობა, გამოშვების წელი, ექსპორტის და წარმოების ქვეყანა და საიდენტიფიკაციო ნომერ(ებ)ი (VIN კოდ(ებ)ი). გთხოვთ იხილოთ თანდართული ცხრილი, რომლის შევსებაც არის რეკომენდირებული ამ კუთხით. განცხადების სამინისტროში წარმოდგენა შესაძლებელია ელექტრონული ფორმით - სამინისტროს ელ-ფოსტაზე (info@mepa.gov.ge) ხელმოწერილი წერილის სახით (იხ. ნიმუში ქვემოთ).