საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

 

ბოლო წლებში ბაზარზე გაიზარდა რძის შემცველი პროდუქტების ასორტიმენტი, რომელთა წარმოებისას რძის ცხიმი ნაწილობრივ ან სრულად ჩანაცვლებულია არარძისმიერი ცხიმებით. მიუხედავად მოქმედი ეტიკეტირების მოთხოვნებისა, პრაქტიკა აჩვენებს, რომ მომხმარებლების მნიშვნელოვანი ნაწილი ვერ ახდენს ასეთი პროდუქტების მკაფიოდ იდენტიფიცირებას, რაც ზრდის შეცდომაში შეყვანის რისკს. ფერადი და უნივერსალური პიქტოგრამის გამოყენება წარმოადგენს ვიზუალურად მარტივ და ადვილად აღსაქმელ საშუალებას, რომელიც მომხმარებელს საშუალებას მისცემს სწრაფად გაარჩიოს რძის ნაწარმი რძის შემცველი პროდუქტისგან და მიიღოს ინფორმირებული გადაწყვეტილება შეძენისას.

 

რძის ნედლეულის გამოყენებით წარმოებული პროდუქტები და არარძისმიერი ცხიმების შემცველი პროდუქტები განსხვავდება როგორც შემადგენლობით, ისე წარმოების დანახარჯებით. მათი მკაფიო იდენტიფიცირება და განცალკევებული განთავსება კი უზრუნველყოფს კონკურენციის თანაბარ პირობებს და იცავს იმ  მწარმოებლების ინტერესებს, რომლებიც პროდუქციას სრულად რძის ნედლეულით ამზადებენ.

 

პროდუქციის განცალკევებული განთავსების ვალდებულება საცალო ვაჭრობის ობიექტებში შეამცირებს შემთხვევებს, როდესაც მომხმარებელი პროდუქტის ვიზუალური მსგავსების ან განლაგების გამო ვერ არჩევს რძის ნაწარმს და რძის შემცველ პროდუქტს. აღნიშნული მიდგომა წარმოადგენს დამატებით პრევენციულ მექანიზმს ეტიკეტირების მოთხოვნების პარალელურად.

 

შემოთავაზებული ცვლილებები ემსახურება მომხმარებლისთვის ზუსტი, მკაფიო და ადვილად აღქმადი ინფორმაციის მიწოდებას, რაც შეესაბამება სურსათის შესახებ ინფორმაციის მიწოდების სფეროში დამკვიდრებულ საერთაშორისო და ევროპულ პრაქტიკას, კერძოდ, მომხმარებლის შეცდომაში შეყვანის დაუშვებლობისა და ინფორმირებული არჩევანის უზრუნველყოფის მოთხოვნებს.

გარდა ამისა, არაორგანიზებული წარმოების წესით საქმიანობისას რძის გარდა სხვა პროდუქტების წარმოების აკრძალვა ხელს შეუწყობს საწარმოო პროცესების გამიჯვნას, ჯვარედინი დაბინძურების რისკების შემცირებას და მიკვლევადობის უზრუნველყოფას.