საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

პროექტი განსაზღვრავს ხორბლის ფქვილისგან წარმოებული პურის მიმართ სავალდებულო მოთხოვნებს და არეგულირებს ბიზნესოპერატორის მიერ მისი წარმოების, გადამუშავების, დისტრიბუციისა და ბაზარზე განთავსების პირობებს.

ტექნიკური რეგლამენტის შემუშავების მიზანია ხორბლის ფქვილისგან წარმოებული პურის მიმართ ერთიანი მოთხოვნების დადგენა, პროდუქციის უვნებლობისა და ხარისხის უზრუნველყოფა, მომხმარებლისათვის სურსათის შესახებ სათანადო ინფორმაციის მიწოდება და მომხმარებელთა უფლებების დაცვა.

პროექტით განისაზღვრება რეგულირების სფერო და იმ პურის სახეობები, რომლებზეც ვრცელდება ტექნიკური რეგლამენტის მოთხოვნები. კერძოდ, რეგულირება მოიცავს ხორბლის ცეხვილი, მეორე, პირველი და უმაღლესი ხარისხის ფქვილისაგან, აგრეთვე აღნიშნული ფქვილების ნარევისაგან დამზადებულ პურს, მათ შორის სხვადასხვა ინგრედიენტის დამატებით წარმოებულ პურს.

პროექტით დგინდება ძირითადი ტერმინების განმარტებები, მათ შორის „ხორბლის ფქვილი“, სხვადასხვა ხარისხის ხორბლის ფქვილი, „ხორბლის ფქვილის პური“, „ფორმის პური“, „ძირის პური“, „ფორტიფიცირებული პური“, „ფორტიფიკანტი“ და „დეკლარირებული სტანდარტი“.

ტექნიკური რეგლამენტის მნიშვნელოვანი ნაწილი ეთმობა პურის ბაზარზე განთავსების პირობებს. დადგენილია, რომ ბაზარზე განთავსებული პროდუქტ უნდა აკმაყოფილებდეს საქართველოს კანონმდებლობით განსაზღვრულ უვნებლობის მოთხოვნებს და სათანადოდ უნდა იქნეს ეტიკეტირებული. კერძოდ, პროდუქტის დასახელებაში გამოყენებული უნდა იქნეს „ხორბლის ფქვილის პური“ ან „პური ხორბლის ფქვილისა“, ხოლო ინგრედიენტების ჩამონათვალში სავალდებულოა გამოყენებული ფქვილის ხარისხის მითითება მასის კლებადობის მიხედვით.

პროექტი ასევე ითვალისწინებს ფორტიფიცირებული პურის წარმოებისა და ბაზარზე განთავსების შესაძლებლობას შესაბამისი ტექნიკური რეგლამენტებით დადგენილი მოთხოვნების დაცვით.

პროექტით განისაზღვრება პურის წარმოებაში გამოსაყენებელი ძირითადი ნედლეული და ინგრედიენტები. გარდა ამისა, რეგლამენტი ადგენს მოთხოვნებს საკვებ დანამატების, საკვები ფერმენტების, ვიტამინების, მინერალებისა და ზოგიერთი სხვა ნივთიერების გამოყენების მიმართ და ითვალისწინებს შესაბამისი ტექნიკური რეგლამენტებით განსაზღვრული პირობების დაცვას.

პროექტით დგინდება პურის მიმართ ზოგადი და სპეციფიკური მოთხოვნები. ზოგადი მოთხოვნები მოიცავს პურის ორგანოლეპტიკურ და ტექნოლოგიურ მახასიათებლებს, მათ შორის უცხო სუნის, მწარე გემოსა და პურის გულის წებოვნების დაუშვებლობას. ასევე დადგენილია მოთხოვნები პურის გამოცხობის ფორმის, ცალობითი ნაწარმის მასის დასაშვები გადახრისა და სხვა მახასიათებლების მიმართ.

სპეციფიკური მოთხოვნები მოიცავს პურის ფორმის, ზედაპირის, ქერქისა და გულის მახასიათებლებს. ამასთან, პროექტით განსაზღვრულია ფიზიკურ-ქიმიური მაჩვენებლები ფქვილის სხვადასხვა ხარისხისაგან დამზადებული პურისათვის.

პროექტით ასევე რეგულირდება პურის წარმოებასთან, გადამუშავებასა და დისტრიბუციასთან დაკავშირებული ჰიგიენური მოთხოვნები.

განსაკუთრებული მოთხოვნები დგინდება პურის წარმოების შემდგომ დაყოვნების, შეუფუთავი პურის პარტიის თანმხლები დოკუმენტაციის, საცალო ვაჭრობის პუნქტში რეალიზაციის ვადისა და პურის დატვირთვის, ტრანსპორტირებისა და გადმოტვირთვის პირობების მიმართ.

ტექნიკური რეგლამენტის მოთხოვნებთან პურის შესაბამისობის კონტროლი განხორციელდება როგორც საქართველოს კანონმდებლობით უფლებამოსილი სახელმწიფო ორგანოს მიერ სახელმწიფო კონტროლის ფარგლებში, ისე ბიზნესოპერატორის მიერ შიდა საწარმოო კონტროლის განხორციელებისას.

პროექტით გათვალისწინებული მოთხოვნების შემოღება ხელს შეუწყობს ხორბლის ფქვილისგან წარმოებული პურის მიმართ ერთიანი მარეგულირებელი მოთხოვნების ჩამოყალიბებას, პროდუქციის ხარისხისა და უვნებლობის უზრუნველყოფას, ბიზნესოპერატორებისათვის წარმოებისა და ბაზარზე განთავსების მკაფიო წესების განსაზღვრას და მომხმარებლისათვის პროდუქტის შესახებ სანდო და სრულყოფილი ინფორმაციის მიწოდებას.

ტექნიკური რეგლამენტი გავრცელდება იმ ბიზნესოპერატორებზე, რომლებიც ახორციელებენ შესაბამისი პურის წარმოებას, გადამუშავებას, დისტრიბუციას ან ბაზარზე განთავსებას. რეგლამენტით დადგენილი მოთხოვნები არ ზღუდავს სხვა სახეობის პურის წარმოებას იმ შემთხვევაში, თუ აღნიშნული პროდუქტი ბაზარზე არ განთავსდება ამ ტექნიკური რეგლამენტით განსაზღვრული პურის დასახელებით.