საქართველოს გარემოს დაცვისა და სოფლის მეურნეობის სამინისტრო საქართველოს გარემოს დაცვისა და სოფლის მეურნეობის სამინისტრო

წარმოდგენილი პროექტი შემუშავებულია სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის 75-ე მუხლის მე-2 ნაწილისა და პროდუქტის უსაფრთხოებისა და თავისუფალი მიმოქცევის კოდექსის 56-ე მუხლის პირველი ნაწილის და 58-ე მუხლის მე-2 ნაწილის შესაბამისად.

ნორმატიული აქტის პროექტის მომზადება განპირობებულია ძეხვეული ნაწარმის წარმოების, გადამუშავების, დისტრიბუციისა და ბაზარზე განთავსების პროცესში ერთიანი მოთხოვნების დადგენის, მომხმარებელთა უფლებების დაცვისა და პროდუქციის შესახებ მომხმარებლისთვის მიწოდებული ინფორმაციის გამჭვირვალობის უზრუნველყოფის აუცილებლობით.

პროექტი მიზნად ისახავს ძეხვეული ნაწარმის ძირითადი კომერციული სახეობების მიმართ მოთხოვნების განსაზღვრას, გამოყენებული ნედლეულის, პროდუქციის შემადგენლობის, ხარისხობრივი მაჩვენებლების, ნიშანდებისა და ეტიკეტირების წესების მოწესრიგებას.


პროექტით განსაზღვრულია ძეხვეულ ნაწარმთან დაკავშირებული ტერმინთა განმარტებები, ზოგადი მოთხოვნები ძეხვეული ნაწარმის და გამოყენებული ნედლეულის მიმართ, მზა სურსათთან შეხებაში მყოფ მასალების და ნაკეთობების, ასევე ნიშანდების და ეტიკეტირების მიმართ.

პროექტით განსაზღვრული მოთხოვნები ვრცელდება ბაზარზე განთავსებული ძეხვეული ნაწარმის მიმართ. მოთხოვნები არ ვრცელდება ფიზიკური პირის მიერ ძეხვეული ნაწარმის წარმოებაზე, რომელიც, საქართველოს კანონმდებლობის შესაბამისად, წარმოადგენს ოჯახური წარმოების სუბიექტს. მოთხოვნები არ ვრცელდება ასევე ხორცის შემცველ სურსათზე, რომელშიც ცხოველის კუნთოვანი ქსოვილის შემცველობა, თერმული დამუშავების შედეგად პროდუქტის მიერ დაკარგული წყლის რაოდენობის გათვალისწინების გარეშე, შეადგენს 10,0 %-ს ან ნაკლებია 10,0 %-ზე. ასეთი სურსათი არ განეკუთვნება ძეხვეულის ნაწარმს. ცხოველის ხორცი (კუნთოვანი ქსოვილი) არ მოიცავს მექანიკურად განცალკევებულ ხორცს.

პროექტის თანახმად ძეხვეული ნაწარმი იყოფა კატეგორიებად. დაყოფა ხდება ხორცის (კუნთოვანი ქსოვილის) მასური წილის მიხედვით. ეკატეგორიებია: უმაღლესი, პირველი, მეორე და მესამე კატეგორიები. თითოეული კატეგორიისთვის გათვალისწინებულია ბიზნესოპერატორის მიერ შესაბამისი უნივერსალური პიქტოგრამის განთავსების ვალდებულება ეტიკეტის ხედვის ძირითად არეალში.


ნორმატიული აქტის მიღების საჭიროება უკავშირდება ძეხვეული ნაწარმის შესახებ მომხმარებლისთვის ინფორმაციის მიწოდების ერთიანი მიდგომის ჩამოყალიბებას, პროდუქციის შემადგენლობისა და ხარისხობრივი მახასიათებლების მიმართ მკაფიო მოთხოვნების განსაზღვრას და ბაზარზე განთავსებული პროდუქციის შესაბამისობის უზრუნველყოფას.

პროექტის მიღება ხელს შეუწყობს მომხმარებლის მიერ პროდუქციის კატეგორიისა და შემადგენლობის შესახებ ინფორმირებული არჩევანის გაკეთებას, ეტიკეტირებისას შეცდომაში შემყვანი პრაქტიკის პრევენციას და ბიზნესოპერატორებისთვის წინასწარ განსაზღვრული მოთხოვნების დაწესებას.

პროექტი ასევე ადგენს ძეხვეული ნაწარმის სენსორულ და ფიზიკურქიმიურ მახასიათებლებს, ბიზნესოპერატორების ვალდებულებებს, პროდუქციის შესაბამისობის შეფასების მექანიზმებსა და ახალი მოთხოვნების ამოქმედებასთან დაკავშირებულ გარდამავალ წესს.